Դադարե՛ք օգտագործել կին լինելը որպես նվաստացնող օբյեկտ ձեր քաղաքական հակամարտություններում. հայտարարություն

Կանանց ռեսուրսային կենտրոն ՀԿ-ն դատապարտել է մամուլի ասուլիսի ժամանակ ՀՀ երկրորդ նախագահ Ռոբերտ Քոչարյանի կողմից արված կնատյաց ​​արտահայտությունները, որոնք ուղղված էին վարչապետ Նիկոլ Փաշինյանին՝ կին լինելու նվաստացնող արտահայտություններով: Հասարակական կազմակերպությունը կոչ է արել դադարեցնել օգտագործել կին լինելը որպես նվաստացնող օբյեկտ քաղաքական հակամարտություններում:

«Բովանդակալից քաղաքական քննարկումների փոխարեն սեքսիստական ​​և կնատյաց լեզու օգտագործելը վկայում է մարդկային արժանապատվության սկզբունքների նկատմամբ խորը անհարգալից վերաբերմունքի մասին: Կանանց կամ նրանց սեռականությունը որպես վիրավորանքի կամ ծաղրի գործիք օգտագործելը քաղաքական քննադատություն չէ. դա բռնություն է, որը նորմալիզացնում է խտրականությունը և ամրապնդում գենդերային կարծրատիպերը:

Մենք ուզում ենք հիշեցնել պարոն Քոչարյանին, որ բազմիցս նշել ենք, որ կին լինելը և ազատ սեռական կյանք ունենալը ամոթ չէ: Անընդունելի է կին լինելու և սեռականություն ունենալու փաստը որպես թուլության նշան հումորային ռեմարկով ներկայացնելը:

Մենք կրկին անգամ կոչ ենք անում բոլոր քաղաքական գործիչներին զերծ մնալ սեքսիստական արտահայտություններից և կենտրոնանալ քաղաքական բովանդակության վրա։ Դադարե՛ք դիտարկել կանանց որպես ստորադաս օբյեկտներ ձեր քաղաքական հակամարտություններում։

Հայաստանի ապագան կկառուցվի հավասարության և հարգանքի վրա, այլ ոչ թե հնացած հայրիշխանական նորմերի»,- ասված է հայտարարության մեջ։