Civilnet
Մեծ Բրիտանիան կվերացնի Հայաստանի և Ադրբեջանի նկատմամբ զենքի էմբարգոն: Այս մասին Մեծ Բրիտանիայի Եվրոպայի և Հյուսիսային Ամերիկայի հարցերով պետական նախարար Սթիվեն Դաութիի գրավոր հայտարարությունը հրապարակվել է Մեծ Բրիտանիայի խորհրդարանի կայքում։
Նա նշել է, որ Մեծ Բրիտանիան ջերմորեն ողջունում է Հայաստանի և Ադրբեջանի կողմից խաղաղության ուղղությամբ արձանագրված առաջընթացը՝ ԱՄՆ նախագահ Դոնալդ Թրամփի նախաձեռնությամբ Վաշինգտոնի խաղաղության գագաթնաժողովի ընթացքում ձեռք բերված համաձայնություններից հետո։
«Հաշվի առնելով խաղաղության առաջխաղացման գործում արձանագրված զգալի առաջընթացը և նախագահ Թրամփի կողմից Վաշինգտոնում վերջերս կայացած գագաթնաժողովի պատմական արդյունքները, Մեծ Բրիտանիան կարծում է, որ ԵԱՀԿ-ի կողմից 1992 թվականին «Լեռնային Ղարաբաղի տարածքում մարտական գործողություններին մասնակցող ուժերին զենքի և զինամթերքի բոլոր մատակարարումների» վերաբերյալ առաջարկված զենքի էմբարգոյի հիմքում ընկած տրամաբանությունը վերացել է։ Հետևաբար, Մեծ Բրիտանիան լիովին կվերացնի Հայաստանի և Ադրբեջանի նկատմամբ զենքի էմբարգոն», - ասել է նա։
Սթիվեն Դաութին նաև նշել է, որ Մեծ Բրիտանիայի կառավարությունը որոշել է իր երկկողմ հարաբերությունները բարձրացնել ինչպես Հայաստանի, այնպես էլ Ադրբեջանի հետ՝ հասցնելով ռազմավարական գործընկերության մակարդակի։
«Նրանց առաջընթացի ճանաչման և խաղաղության ուղղությամբ շարունակական շարժմանը նպաստելու նպատակով, Մեծ Բրիտանիայի կառավարությունը որոշել է իր երկկողմ հարաբերությունները Հայաստանի և Ադրբեջանի հետ բարձրացնել ռազմավարական գործընկերության մակարդակի։ Այս գործընկերությունները կձևակերպեն համագործակցությունը առևտրի, անվտանգության և պաշտպանության ոլորտներում, և կամրապնդվեն ամենամյա նախարարական մակարդակի հանդիպումներով՝ առաջընթացը վերանայելու համար», - ասել է նա։
Պատմություններ
