Փաշինյանը տրամաբանական է համարում, որ «Թրամփի ուղու» հատվածը պետք է սահմանազատվի

Վարչապետ Նիկոլ Փաշինյանը տրամաբանական է համարել, որ այն հատվածներում, որով պետք է անցնի «Թրամփի ուղին»՝ սահմանագծում և սահմանազատում տեղի ունենա։ Միևնույն ժամանակ վարչապետը շեշտեց, որ տարածաշրջանային կոմունիկացիաների բացման և սահմանազատման ընդհանուր գործընթացները միմյանց հետ «խորը փոխկապակցվածություն» չունեն։

«Այն տեղերում, որտեղ հաղորդակցության կառուցում պիտի սկսվի, ենթադրվում է և տրամաբանական է, որ այդ հատվածում նախ սահմանազատում և սահմանագծում տեղի ունենա»,- կառավարության նիստից հետո լրագրողների հետ զրույցում ասաց Փաշինյանը։

Վարչապետը հերքեց այն տեսակետը, թե կոմունիկացիաների բացումը պայմանավորում է սահմանազատման ընդհանուր գործընթացի շարունակությունը՝ նշելով, որ երկու հարցերով զբաղվող հանձնաժողովները կշարունակեն իրենց աշխատանքը։

Ըստ նրա՝ գործընթացների միջև կապը կարող է պայմանավորված լինել միայն նրանով, որ թե՛ Հայաստանի, թե՛ Ադրբեջանի կողմից դրանք համակարգում են նույն փոխվարչապետները։

«Երբ որ կոմունիկացիաների թեման ակտիվանում է, նրանք բնականաբար ավելի մեծ ուշադրություն են դարձնելու, ավելի շատ ժամանակ են տրամադրելու կոմունիկացիաների թեմաներին», - պարզաբանեց նա։