Civilnet
Հոկտեմբերի 20-ին Լյուքսեմբուրգում ԵՄ կողմից կազմակերպված «Միջտարածաշրջանային անվտանգություն և փոխկապակցվածություն» թեմայով նախարարական հանդիպմանը ՀՀ ԱԳ նախարար Արարատ Միրզոյանը մասնակցել է նաև Միջտարածաշրջանային փոխկապակցվածության օրակարգի առաջմղման թեմայով քննարկմանը։ Առաջին անգամ անցկացվող այս ձևաչափով քննարկմանը մասնակցել են ԵՄ անդամ պետությունները, Սևծովյան լայն տարածաշրջանի և Կենտրոնական Ասիայի երկրները։
ԱԳՆ-ից հայտնում են, որ երկու քննարկումների ընթացքում էլ մասնակից պետությունները և ԵՄ պաշտոնյաներն իրենց ելույթներում ողջունել են Հայաստանի և Ադրբեջանի միջև խաղաղության հաստատումը։ Նրանք ընդգծել են դրա կարևորությունը հաղորդակցությունների ընդլայնման և միջտարածաշրջանային համագործակցության խթանման համար, այդ թվում՝ TRIPP ուղու կյանքի կոչման միջոցով։
Իր ելույթում նախարար Միրզոյանը նշել է, որ փոխկապակցվածության խթանումը «ռազմավարական առաջնահերթություն է» Հայաստանի համար։
«Մենք տարածաշրջանային փոխկապակցվածությունը դիտում ենք ոչ միայն որպես տնտեսական աճի շարժիչ ուժ, այլև որպես կենսական գործիք՝ դիմակայունության ամրապնդման և մեր տարածաշրջանում հարատև խաղաղության ու կայունության ապահովման համար»,- ասել է նա։
Միրզոյանը վերահաստատել է, որ Հայաստանը շարունակում է առաջ մղել «Խաղաղության խաչմերուկ» նախաձեռնությունը, որը հիմնված է ինքնիշխանության, տարածքային ամբողջականության և ազգային իրավազորության սկզբունքների վրա։
ԱԳ նախարարն ընդգծել է, որ Վաշինգտոնում ԱՄՆ նախագահի հուրընկալմամբ Հայաստանի և Ադրբեջանի ղեկավարների պատմական հանդիպումը «բացել է իսկական հնարավորություն տարածաշրջանային հաղորդակցությունների ապաշրջափակման համար»։ Նրա խոսքով՝ Համատեղ հռչակագրի և TRIPP ուղու լիարժեք իրականացումը կարող է Հարավային Կովկասը վերածել արդյունավետ և անվտանգ տարանցիկ հանգույցի։
Այս համատեքստում Արարատ Միրզոյանն առանցքային է համարել նաև Հայաստանի և Թուրքիայի միջև ենթակառուցվածքների ապաշրջափակումը։
«Հայաստանի և Թուրքիայի միջև Գյումրի-Կարս երկաթուղու վերաբացումը չի պահանջում խոշոր ներդրումներ, և կարճ ժամանակահատվածում կարող ենք ունենալ գործող երկաթուղի, որը, Հայաստանի և Ադրբեջանի երկաթուղային կապի հետ միասին, կարող է դառնալ «Միջին միջանցք» նախագծի բաղադրիչ։ Ավելին, այն անմիջապես կստեղծի միասնական երկաթուղային ցանց Պարսից ծոցի, Սև և Կասպից ծովերի միջև»,- նշել է նախարարը։
Նա հավելել է, որ փոխկապակցվածությունը չի սահմանափակվում միայն տրանսպորտով, և Հայաստանը հանձնառու է կառուցելու նաև ապագայի թվային և էներգետիկ կապերը՝ ներառյալ էներգետիկ համակարգերի դեկարբոնիզացիան և վերականգնվող աղբյուրների խթանումը։
«Հայաստանը վճռական է ցամաքով սահմանափակված երկրից վերածվել ցամաքի միջոցով փոխկապակցված երկրի՝ խաղաղության, փոխկապակցվածության և բարգավաճման խաչմերուկի»,- եզրափակել է Արարատ Միրզոյանը։
Պատմություններ
