Երևանում 810 կգ ոչ սպանդանոցային ծագման միս է ոչնչացվել․ ՍԱՏՄ
Civilnet
Սննդամթերքի անվտանգության տեսչական մարմինը (ՍԱՏՄ) մայրաքաղաքի վաճառակետերում իրականացրած ստուգումների արդյունքում առգրավել և ոչնչացրել է գրեթե 810 կգ ոչ սպանդանոցային ծագման միս, հայտնում է գերատեսչությունը։
Ըստ հաղորդագրության, ՍԱՏՄ-ն շարունակում է վերահսկողական միջոցառումները միս-մսեղիքի իրացման օբյեկտներում։ Տեսչական մարմնի ղեկավար Տիգրան Պետրոսյանը հետևել է Երևանի Խորենացի փողոցում (ԳՈՒՄ-ի շուկա) և մայրաքաղաքի այլ վաճառակետերում իրականացվող աշխատանքներին։
Մշտադիտարկման ընթացքում ստուգվել են մսի սպանդանոցային ծագումը հավաստող 5-րդ ձևի փաստաթղթի առկայությունը, պահման ու վաճառքի սանիտարահիգիենիկ պայմանները և ջերմաստիճանային ռեժիմների պահպանումը։
Տիգրան Պետրոսյանը տնտեսավարողների հետ զրույցում ընդգծել է, որ վերահսկողական միջոցառումները շարունակական են լինելու և զիջումներ չեն լինելու։ Նա նշել է, որ ոչ սպանդանոցային ծագման միսը ենթակա է առգրավման և ոչնչացման։
Առգրավված մսի ոչնչացման գործընթացն իրականացվել է տեսուչների հսկողությամբ։ Տեսչական մարմինը հայտնել է, որ շարունակելու է հետևողական վերահսկողությունը՝ ապահովելու համար իրավական պահանջի կատարումը և պաշտպանելու սպառողի առողջությունը:
Թեմա
Պատմություններ
