Ադրբեջանը Երևանում չի մասնակցի «Եվրանեսթ»-ին․ պատճառն անցկացման վայրը չէ

Ադրբեջանը չի մասնակցի «Եվրանեսթ» խորհրդարանական վեհաժողովի 12-րդ լիագումար նիստին, որը կանցկացվի հոկտեմբերի 28-30-ը Երևանում։ Պատճառը Եվրոպական խորհրդարանի հայտարարություններն են, որոնք, ըստ Բաքվի, հակասում են երկրի ինքնիշխանությանը և տարածքային ամբողջականությանը։

«Եվրանեսթ»-ում ադրբեջանական պատվիրակության ղեկավար Թահիր Միրկիշիլին ընդգծել է, որ Բաքվի որոշումը կապ չունի այն հանգամանքի հետ, որ նիստը կայանալու է Երևանում։

Միրկիշիլին ԱՊԱ գործակալությանը հայտնել է, որ որոշումն ընդունվել է՝ հաշվի առնելով «Եվրոպական խորհրդարանի հայտարարությունները, որոնք չեն նպաստում տարածաշրջանում Ադրբեջանի և Հայաստանի միջև խաղաղ կարգավորման գործընթացին և աջակցում են այն ուժերին, որոնք շահագրգռված են թշնամության շարունակման մեջ»։

Նրա խոսքով՝ հատկապես անընդունելի է եղել Եվրախորհրդարանի «ոչ կառուցողական հայտարարությունը»՝ արված Վաշինգտոնում Ադրբեջանի նախագահ Իլհամ Ալիևի և Հայաստանի վարչապետ Նիկոլ Փաշինյանի «խաղաղ հանդիպումից» հետո այս տարվա օգոստոսին, երբ կողմերը նախաստորագրել էին խաղաղության համաձայնագիր։

Վրաստանը ևս հրաժարվել է մասնակցել նիստին։ Վրացական կողմը հայտարարել է, որ Եվրոպական խորհրդարանի որոշ անդամների՝ Վրաստանի նկատմամբ թշնամական հռետորաբանությունն ու գործողությունները, որոնք մասնակցում են «Եվրանեսթ» ԽՎ-ի աշխատանքներին, հակասում են այն գործընկերության և փոխադարձ հարգանքի սկզբունքներին, որոնց վրա պետք է հիմնված լինի այս հարթակը։