Հայտնաբերվել է ապօրինի զենք-զինամթերք. շուրջ 30 անձ ձերբակալվել է. ՔԿ
Civilnet
Քննչական կոմիտեն տեղեկացնում է ապօրինի զենք-զինամթերքի հայտնաբերման և մոտ երեք տասնյակ անձանց ձերբակալման մասին:
Ըստ հաղորդագրության՝ ՔԿ Երևանի քննչական վարչությունում քննվող մի շարք քրեական վարույթներով ՆԳՆ ոստիկանության ծառայողների հետ համատեղ միջոցառումների արդյունքում ձեռք են բերվել փաստական տվյալներ, որ մի շարք անձինք իրենց մոտ, տրանսպորտային միջոցներում և բնակության վայրերում ապօրինի պահում են զենք-զինամթերք:
Իրականացվել են մեծածավալ քննչական և վարութային գործողություններ, մասնավորապես՝ 2025 թվականի նոյեմբերի 5-ին շուրջ վեց տասնյակ հասցեներում իրականացվել են խուզարկություններ: Հայտնաբերվել և վերցվել են տարբեր տեսակի զենք-զինամթերք, թմրանյութեր, այլ առարկաներ:
Քրեական վարույթի նախաքննության ընթացքում ապօրինի զենք-զինամթերք, ինչպես նաև թմրամիջոցներ պահելու կասկածանքով ձերբակալվել են շուրջ երեք տասնյակ անձինք:
Քննչական կոմիտեն հորդորում է ապօրինի պահվող զինամթերքն ինքնակամ հանձնել իրավապահ մարմինների՝ հիշեցնելով, որ մինչև իրավասու մարմինների կողմից ապօրինի զենք-զինամթերքի գտնվելու վայրի մասին իմանալը դրանք հանձնած անձն ազատվում է քրեական պատասխանատվությունից:
Թեմա
Պատմություններ
