Գնից է կախված՝ կառավարությունը կգնի ՀԷՑ-ը, թե ոչ
Civilnet
ՀԷՑ-ը (Հայաստանի էլեկտրական ցանցեր) ձեռք բերելու հարցով կառավարությունը վերջնական դիրքորոշում կհայտնի Հանրային ծառայությունները կարգավորող հանձնաժողովի որոշումից հետո։ Այս մասին հայտարարել է վարչապետ Նիկոլ Փաշինյանը կառավարությունում ճեպազրույցի ժամանակ։
«Հարց է ծագելու ինչքան է գինը, գնից է կախված, իսկ գինը պետք է որոշվի համակողմանի վերլուծության արդյունքում»,- ասաց վարչապետը։
Փաշինյանի խոսքով՝ հանձնաժողովի որոշումը կսահմանի, թե կառավարությունը կգնա ՀԷՑ-ը պետական բյուջեի միջոցներով գնելու տարբերակով, թե՝ մասնավորեցման ուղով։
Վարչապետը նշեց, որ եթե առաջարկվող գինը լինի տրամաբանական և բյուջեի հնարավորություններին համահունչ, կառավարությունը լրջորեն կքննարկի գնելու տարբերակը։ Եթե գինը չափազանց բարձր լինի, կիրագործվի երկրորդ սցենարը՝ մասնավորեցում միջազգային հեղինակություն ունեցող ընկերության մասնակցությամբ։
Նա հավելեց, որ կառավարությունը ցանկացած տարբերակի դեպքում կպահպանի որոշակի ներկայություն՝ օրենսդրական կամ բաժնետոմսային մեխանիզմներով։ Փաշինյանը ընդգծել է, որ հարցը ներառում է տնտեսատեխնիկական նրբություններ, որոնց գնահատումը պետք է իրականացնեն մասնագետները։
***
ՀԷՑ-ն ազգայնացնելու մտադրության մասին Փաշինյանն առաջին անգամ հայտնեց այն բանից հետո, երբ հունիսի 17-ին ռուսաստանաբնակ գործարար Սամվել Կարապետյանը իր աջակցությունը հայտնեց Հայ առաքելական եկեղեցուն և Ամենայն Հայոց կաթողիկոսին, որին Փաշինյանը փորձում է գահընկեց անել։ Իրավապահները նախ խուզարկեցին Կարապետյանի երևանյան առանձնատունը, նրա բերման ենթարկեցին, ապա դատարանը նրան կալանավորեց երկու ամսով։ Փաշինյանը հայտարարեց Կարապետյանին պատկանող Հայաստանի էլեկտրական ցանցեր ընկերությունը ազգայնացնելու իր մտադրության մասին։
Հուլիսի 3-ին Ազգային ժողովն ամբողջությամբ ընդունեց «Հայաստանի էլեկտրական ցանցեր»-ը պետականացնելուն միտված նախագիծը:
Պատմություններ
