Սահմանադրական բարեփոխումների իրազեկման արշավի ձևաչափը դեռ սահմանված չէ․ ԱՆ

Դեռևս հստակ սահմանված ձևաչափ առկա չէ սահմանադրական բարեփոխումների իրազեկման արշավի իրականացման վերաբերյալ: Այս մասին ՍիվիլՆեթին հայտնել են արդարադատության նախարարությունից։

Նախարարությունից հայտնել են, որ Սահմանադրական բարեփոխումների խորհուրդը գտնվում է Նոր Սահմանադրության նախագծի տեքստի մշակման փուլում։

«Սահմանադրական բարեփոխումների խորհուրդը որոշումներ է ընդունել Ազգային ժողովի կազմավորման ընթացակարգը սահմանող կարգավորումների վերանայման, Ազգային ժողովի ինքնարձակման կառուցակարգերի սահմանման, Ազգային ժողովի մշտական հանձնաժողովների թիվը սահմանադրական օրենքով սահմանելու և էթիկայի մշտական հանձնաժողով ձևավորելու վերաբերյալ սահմանադրական կարգավորումների նախատեսման, Ազգային ժողովի մշտական հանձնաժողովների կողմից փոխվարչապետին, նախարարին կամ դիվանագիտական ներկայացուցիչներին անվստահություն հայտնելու եզրակացություն ընդունելու կառուցակարգերի սահմանման,  իրավական նորմերի աստիճանակարգության և ինքնավար մարմինների ստեղծման և գործունեության ընթացակարգերին առնչվող կարգավորումների վերաբերյալ, ինչպես նաև քննարկել է զինված ուժերին, պաշտոնատար անձանց անձեռնմխելիությանը, անկախ և ինքնավար մարմիններին և դրանց անդամներին վերաբերող հարցեր»,- նշել են նախարարությունից։

Հոկտեմբերի 27-ին արդարադատության նախարար Սրբուհի Գալյանը լրագրողների հետ զրույցում հայտնել էր, որ առաջիկա երկու շաբաթների ընթացքում կսկսվի Սահմանադրական բարեփոխումների իրազեկման արշավը և բոլոր այն դրույթները, որոնց վերաբերյալ կա խորհրդի քվեարկությունը՝ կներկայացվի հանրությանը։ 

***

Փետրվարի 19-ին Նիկոլ Փաշինյանը հայտարարել է երկրում նոր սահմանադրության ընդունելու անհրաժեշտության մասին։

Նոր Սահմանադրության անհրաժեշտության մասին վարչապետը խոսել է Բաքվից հնչող պահանջների ֆոնին։ Չնայած, որ 2018-ի հեղափոխությունից հետո Փաշինյանը հայտարարել էր սահմանադրական բարեփոխումների անհրաժեշտության մասին։ 2019-ի հունիսին ստեղծվել է Սահմանադրական բարեփոխումների հանձնաժողով՝ կենտրոնանալով դատական բարեփոխումների և կառավարման մոդելի վրա։

Բաքուն պնդում է, որ Հայաստանի Սահմանադրության նախաբանը, որը հղում է անում Հայաստանի 1990-ի Անկախության հռչակագրին, տարածքային պահանջ է ենթադրում Ադրբեջանին, քանի որ Անկախության հռչակագիրն իր հերթին հղում է անում Հայկական ԽՍՀ-ի՝ Լեռնային Ղարաբաղի Ինքնավար Մարզի վերամիավորման մասին օրենքին։

Պաշտոնական Բաքուն պարբերաբար հայտարարում է, որ «Խաղաղության պայմանագրի ստորագրման գլխավոր պայմանը Հայաստանի Սահմանադրության փոփոխությունն է»։