Զինված ուժերի սպառազինության արդիականացման աշխատանքները շարունակվում են․ Պապիկյան

Զինված ուժերի սպառազինության արդիականացման աշխատանքները շարունակվում են։ Այս մասին հայտարարել է պաշտպանության նախարար Սուրեն Պապիկյանը խորհրդարանի ամբիոնից։

«Ռազմատեխնիկական կապերի ընդլայնումն ու սպառազինության դիվերսիֆիկացիան մեր անվտանգային ճարտարապետության գլխավոր ուղղություններից է։ Հենց այս տրամաբանությամբ էլ շարունակում ենք՝ համագործակցելով նոր գործընկերների հետ»,- ասաց նախարարը։

Անդրադառնալով տեղական ռազմարդյունաբերության հետ համագործակցությանը, Պապիկյանը նշեց․

«2022-ին տեղական ռազմարդյունաբերության հետ ունեցել ենք 5,5 մլրդ դրամի պայմանագիր։ Հետագայում եռամյա պայմանագրերի արդյունքում այսօր այդ թիվը 171 մլրդ դրամ է»։

Պաշտպանության նախարարն ընդգծեց, որ Հայաստանն իր սպառազինությունն ու բանակն օգտագործելու է մեկ նպատակով՝ ՀՀ տարածքային ամբողջականությունն ու ինքնիշխանությունը պաշտպանելու համար։

Նախորեին՝ նոյեմբերի 11-ին պաշտպանության նախարարն ԱԺ-ում հայտարարել է, որ Հայաստանի պաշտպանական ծախսերն էապես աճել են 2023-ից սկսած։

«Իրականացվել են ու իրականացվելու են աննախադեպ ծախսեր»,– ասել է նախարարը՝ ընդգծելով, որ դրանք փոխել են ՊՆ-ի հնարավորությունները՝ բանակի կարիքներից մինչև զինծառայողների սոցիալական կարգավիճակ։

Նրա խոսքով՝ 2025-ի և 2026-ի բյուջեների միջև նկատվող «դիսբալանսը» իրականում պլանավորված է։