Civilnet
Հայաստանն առաջին անգամ ընտրվել է Համաշխարհային ժառանգության կոմիտեի անդամ։ Այս մասին հայտնում են ԱԳՆ մամուլի ծառայությունից։
Ընտրությունը տեղի է ունեցել նոյեմբերի 24-ին Փարիզում` ՅՈՒՆԵՍԿՕ-ի կենտրոնակայանում անցկացվող Մշակութային և բնության համաշխարհային ժառանգության պաշտպանության մասին կոնվենցիայի անդամ պետությունների գլխավոր ասամբլեայի 25-րդ նստաշրջանի շրջանակներում:
«Ընտրությունների՝ ազատ տեղերի համար նախատեսված փուլում Հայաստանը գրանցել է լավագույն արդյունքը՝ ստանալով հնարավոր 161-ից 105 ձայն, ինչը վկայում է մշակութային ժառանգության պահպանման ոլորտում Հայաստանի նկատմամբ միջազգային հանրության բարձր վստահության մասին։
Ստանձնելով Համաշխարհային ժառանգության կոմիտեում անդամակցությունը՝ Հայաստանը վերահաստատել է իր հանձնառությունը՝ ուղղված մշակութային և բնական ժառանգության պատշպանության, պահպանման և վերականգնման, ինչպես նաև Համաշխարհային ժառանգության կոնվենցիայի հիմնարար սկզբունքների առաջմղման գործում միջազգային ջանքերի խթանմանը»,- ասված է հաղորդագրության մեջ:
Ադրբեջանը ևս ընտրվել է ՅՈՒՆԵՍԿՕ-ի Համաշխարհային ժառանգության կոմիտեի անդամ՝ ստանալով հնարավոր 161-ից 92 ձայն։
Բաց աղբյուրներից չհաջողվեց պարզել, արդյոք Հայաստանն ու Ադրբեջանը միմյանց օգտին կամ միմյանց դեմ են քվեարկել։
ՅՈՒՆԵՍԿՕ-ի Գլխավոր Ասամբլեայի Կանոնակարգում ասվում է, որ Համաշխարհային ժառանգության կոմիտեի անդամների ընտրությունները կատարվում են գաղտնի քվեարկությամբ, երբ դա պահանջում են քվեարկելու իրավունք ունեցող հինգ կամ ավելի պատվիրակություններ, կամ եթե այդպես է որոշում նախագահը։
Պատմություններ
