Տրանսպորտի եկամուտները պակաս են կանխատեսվածից. կառավարությունը փակում է Երևանի բյուջեի ճեղքվածքը

Կառավարությունը նոյեմբերի 27-ին չզեկուցվող հարցերի շարքում որոշեց ավելի քան 3 մլրդ դրամ հատկացնել Երևանի քաղաքապետարանին՝ մայրաքաղաքի բյուջեում առաջացած ճեղքվածքը փակելու և տրանսպորտային համակարգի բնականոն աշխատանքն ապահովելու նպատակով։

Ըստ նախագծի հիմնավորման՝ Երևան քաղաքի 2025-ի բյուջեում առկա է թերհավաքագրում, որը հատկապես վերաբերում է հանրային տրանսպորտի ուղեվարձերի վճարմանը: Տարեկան բյուջեով նախատեսվել էր հավաքագրել շուրջ 21,3 միլիարդ դրամ, սակայն ընթացիկ կանխատեսումներով սպասվում է շուրջ 5,5 միլիարդ դրամի պակաս:

Միևնույն ժամանակ նշվում է, որ քաղաքապետարանը նախատեսում է ձեռք բերել 45 նոր տրոլեյբուս, որի պայմանագրային արժեքի 30 տոկոսն արդեն վճարվել է կառավարության աջակցությամբ։ Ծրագիրն ավարտին հասցնելու համար անհրաժեշտ է վճարել մնացած 70 տոկոսը։

Ընթացիկ ծախսերն ապահովելու և համայնքային ծրագրերը չտապալելու համար կառավարությունը պահուստային ֆոնդից Երևանին տրամադրեց ավելի քան 3 մլրդ դրամ՝ որպես այլ դոտացիա:

Այս հատկացումը կուղղվի թերհավաքագրումների հետևանքով առաջացած բացը լրացնելուն: Ըստ որոշման՝ սա հնարավորություն կտա համայնքի սեփական եկամուտներից հավաքագրված միջոցները 2026-ին՝ որպես տարեսկզբի ազատ մնացորդ, ուղղել 45 նոր տրոլեյբուսների ձեռքբերման պայմանագրային գնի մնացած 70 տոկոսի վճարմանը։

Նշվում է, որ հատկացումը չի ազդի պետական բյուջեի եկամուտների և ծախսերի ընդհանուր հաշվեկշռի վրա, քանի որ իրականացվում է պահուստային ֆոնդի հաշվին։

Գևորգ Թոսունյան