Բարձր ջերմություն, հազ, քթահոսություն, մկանահոդացավ․ A(H3N2) տիպի վիրուսներ են շրջանառվում

Հայաստանում շրջանառվում են գրիպի A(H3N2) տիպի վիրուսները։ Այս մասին ֆեյսբուքյան իր էջում հայտնել է առողջապահության նախարար Անահիտ Ավանեսյանը։

Վիրուսի ախտանշաններն են` բարձր ջերմություն (39 - 40C), հազ, քթահոսություն, մկանահոդացավ:

Շրջանառվում են նաև ռինո-, բոկա-, ադենովիրուսներ և պարագրիպի հարուցիչները։

Նախարարը հայտնել է, որ սուր շնչառական վարակների սեզոնին ԿԳՄՍ-ի հետ համատեղ նախադպրոցական ու դպրոցական հաստատություններում ներդրվել է «համաճարակային ֆիլտր», որի սահմանաչափը գերազանցելու դեպքում ուսուցումը անցնում է հեռավար ձևաչափի։

«Գրիպի լավագույն կանխարգելումը պատվաստումն է, որը նվազեցնում է հիվանդանալու հավանականությունը, թեթևացնում է հիվանդության ընթացքն ու բարդությունները»,- գրել է նախարարը։

Հիվանդությունների վերահսկման և կանխարգելման ազգային կենտրոնի հրապարակած տվյալների համաձայն՝ դեկտեմբերի 1-ի տվյալներով նախադպրոցական ու դպրոցական հաստատություններում  գրանցվել է 55,030 բացակա, որոնցից, 11,033-ը՝ սուր շնչառական վարակների պատճառով՝ընդհանուր սաների 2,3%-ը: