Civilnet
Ամենայն Հայոց Կաթողիկոսի Հայրապետական տնօրինությամբ դեկտեմբերի 2-ին կարգալույծ է հռչակվել Թալինի տարածաշրջանի հոգևոր հովիվ Տեր Թադե քահանա Թախմազյանը։ Այս մասին հայտնում են Մայր Աթոռի տեղեկատվական համակարգից:
Տնօրինության համար հիմք է ծառայել Արագածոտնի թեմի Վարչական խորհրդի զեկուցագիրը և Հայաստանյայց Առաքելական Սուրբ Եկեղեցու Մայր Աթոռ Սուրբ Էջմիածնի Պարգևների շնորհման և կարգապահական հարցերի հանձնախմբի եզրակացությունը ստորև ներկայացված հիմնավորումներով առ այն, որ Թադե քահանան՝
ա/ վարկաբեկել է Հայ Եկեղեցին և եկեղեցականներին, այդ թվում՝ հրապարակային զրպարտիչ հայտարարություն տարածելով,
բ/ իրականացրել է հակաեկեղեցական գործողություններ՝ մասնակցելով կարգալույծ հռչակված անձի մեղքին,
գ/ պատարագներին Ամենայն Հայոց Կաթողիկոսի և Թեմակալ առաջնորդի անունների հիշատակության հատվածը կամայականորեն զեղչել է՝ փաստացի ժխտելով նվիրապետական կարգը, իրեն դուրս դնելով Եկեղեցուց և, ըստ էության, հարելով հերձվածողական շարժմանը,
դ/ եկեղեցական իշխանության նկատմամբ դրսևորել է անհնազանդություն։
Կարգալույծ եկեղեցականն այսուհետ կդասվի աշխարհականների շարքին՝ Արամայիս Թախմազյան ավազանի անունով:
***
Վերջին ամիսներին, իշխանության և Մայր Աթոռի միջև քաղաքական լարվածության ֆոնին, քահանաներ են կարգալույծ լինում: Հոկտեմբերի 21-ին Ամենայն Հայոց Կաթողիկոս Գարեգին Երկրորդի Հայրապետական տնօրինությամբ կարգալույծ էր արվել Տեր Արամ քահանա Ասատրյանը (աշխարհիկ անունը՝ Ստեփան Ասատրյան)։ Կարգալույծ հռչակելու հիմքը եղել է հնազանդության ուխտը դրժելը և Եկեղեցական Կարգապահական Հանձնախմբի նիստերին ներկայանալուց համառորեն հրաժարվելը։
Տեր Արամ այն քահանաներից մեկն էր, որը հրապարակայնորեն պահանջում էր Գարեգին Երկրորդի հրաժարականը։ Տեր Արամին կարգալույծ հռչակելու որոշումն ուղեկցվեց քաղաքական սուր արձագանքով, երբ վարչապետ Նիկոլ Փաշինյանը հրապարակային ելույթով, հակադարձելով, հայտարարեց, որ ինքն է կարգալույծ հռչակում Կաթողիկոսին՝ հիմնվելով նրա կուսակրոնության ուխտը խախտելու մասին լուրերի վրա։
Նոյեմբերի 6-ին էլ կարգալույծ էր հռչակվել Տավուշի թեմի հոգևոր սպասավոր Տեր Տարոն քահանա Հունանյանը: Մայր Աթոռի տարածած հաղորդագրության մեջ նշվում է, որ Տարոն քահանան ինքնակամ լքել է իր ծառայության վայրը 2024-ի մայիս ամսից, անտեսել է Տավուշի թեմի առաջնորդական տեղապահի հորդորներն ու հրահանգները և հարատևել կարգազանց ընթացքի մեջ, մասնակցել է կարգազուրկ հռչակված Ստեփան Ասատրյանի կազմակերպած հակականոնական արարողությանը՝ մեղսակից դառնալով կարգալուծվածին, հրապարակային ելույթներով ու հայտարարություններով վարկաբեկել է Հայաստանյայց Առաքելական Սուրբ Եկեղեցին և ծառայակից եկեղեցականներին, անարգալից վարքագիծ է դրսևորել եկեղեցական բարձրագույն իշխանության նկատմամբ և դրժել հնազանդության ուխտը:
Պատմություններ
