Փաշինյանը Մոսկվայում մասնակցում է ԵԱՏՄ միջկառավարական խորհրդի նիստին

Վարչապետ Նիկոլ Փաշինյանը ժամանել է Մոսկվա և մասնակցում է Եվրասիական միջկառավարական խորհրդի նիստին, հաղորդում է ՌԻԱ Նովոստին։

Նիստին մասնակցում են նաև ՌԴ վարչապետ Միխայիլ Միշուստինը, Բելառուսի վարչապետ Ալեքսանդր Տուրչինը, Ղազախստանի վարչապետ Օլժաս Բեքթենովը, Ղրղզստանի վարչապետ Ադըլբեկ Կասըմալիևը և Եվրասիական տնտեսական հանձնաժողովի կոլեգիայի նախագահ Բակիտժան Սագինտաևը։

ՌԴ կառավարության մամուլի ծառայությունը նախապես հայտնել էր, որ միջոցառման ընթացքում Միության անդամ երկրների կառավարությունների ղեկավարները քննարկելու են Եվրասիական տնտեսական ինտեգրացիայի հետագա խորացման հարցերը։ Հատուկ ուշադրություն կդարձվի ԵԱՏՄ ներքին շուկայի գործունեությանը, ինչպես նաև էներգետիկ, արդյունաբերական և գյուղատնտեսական ոլորտներում փոխգործակցության զարգացմանը։

Ավելի վաղ Հայաստանի վարչապետի մամուլի խոսնակ Նազելի Բաղդասարյանը հայտնել էր, որ Նիկոլ Փաշինյանի ինքնաթիռը գիշերը չի կարողացել վայրէջք կատարել Մոսկվայում օդային տարածքի ժամանակավոր փակման պատճառով և ուղարկվել էր Սանկտ Պետերբուրգի օդանավակայան։