Civilnet
Եվրոպական Միության Արտաքին գործերի նախարարների խորհրդի նիստին Բարձր ներկայացուցիչ Կայա Կալլասը հայտարարել է, որ այս շաբաթը լինելու է դիվանագիտական ծանր շաբաթ։ Քննարկումների առանցքում լինելու է Ուկրաինայի ֆինանսավորման «կենաց-մահու», ինչպես նաև Հայաստանի ֆինանսավորման հարցը։ Այս մասին տեղեկանում ենք Եվրոպական միության Արտաքին գործողությունների ծառայության (EEAS) պաշտոնական կայքից։
Կալլասը նշել է, որ նախաճաշի ընթացքում քննարկվելու է, թե ինչպես կարող է ԵՄ-ն օգնել Հայաստանին՝ հաշվի առնելով մոտալուտ ընտրությունները, հատկապես այն բանից հետո, երբ Երևանը խնդրել է նմանատիպ աջակցություն՝ «չարամիտ ազդեցության» դեմ պայքարելու համար, ինչպիսին տրամադրվել էր Մոլդովային։
Դեկտեմբերի 15-ին ԱԳ նախարար Արարատ Միրզոյանն աշխատանքային այցով գտնվելու է Բրյուսելում՝ մասնակցելու ԵՄ անդամ պետությունների արտաքին գործերի նախարարների խորհրդի ձևաչափով հանդիպմանը։
***
Դեկտեմբերի 2-ին Բրյուսելում արտաքին գործերի նախարար Արարատ Միրզոյանի և ԵՄ ԱԳԱՔ բարձր ներկայացուցիչ Կայա Կալասի հետ համատեղ ասուլիսի ընթացքում ԵՄ ընդլայնման հարցերով հանձնակատար Մարթա Կոսը հայտարարել էր, որ Եվրոպական միությունը Հայաստանին ֆինանսական աջակցություն կտրամադրի 2026-ի խորհրդարանական ընտրությունների ընթացքում ապատեղեկատվության դեմ պայքարի համար:
«5 մլն եվրո համագործակցության ֆինանսավորում ենք տրամադրում Արևելյան գործընկերության տարածաշրջանի համար, այդ թվում՝ Հայաստանին, ընտրություններին ընդառաջ ապատեղեկատվության դեմ պայքարը ապահովելու համար»,- ասել է Կոսը:
Պատմություններ
