Civilnet
Ամերիկայի Արևելյան թեմի Հայաստանյայց Առաքելական Եկեղեցու առաջնորդն ու Թեմական խորհուրդը հանդես են եկել պաշտոնական հայտարարությամբ՝ խորը մտահոգություն հայտնելով Հայաստանում պետության և եկեղեցու միջև սրվող իրավիճակի և վերջին իրադարձությունների կապակցությամբ։ Հայտարարության մեջ նշվում է, որ այս երկու հիմնարար հաստատությունները, սփյուռքի հետ միասին, կենսական նշանակություն ունեն ազգի գոյատևման համար, ուստի կողմերին կոչ է արվում ցուցաբերել զսպվածություն և պահպանել ազգային միասնությունը։
Թեմական ղեկավարությունն ընդգծել է, որ Հայաստանի Հանրապետության Սահմանադրությունն ու ժողովրդավարական գործընթացները պետք է հարգվեն նույնքան, որքան Հայաստանյայց Առաքելական Սուրբ Եկեղեցու ինքնավարությունը, կանոններն ու դարավոր արարողակարգերը։ Ըստ հայտարարության՝ աշխարհաքաղաքական անորոշության և համաշխարհային հանրության ուշադրության կենտրոնում գտնվելու այս վճռորոշ պահին անհրաժեշտ է, որ ազգային հաստատությունները մնան ամուր և կատարեն իրենց դերերը. պետությունը պետք է առաջնորդի ժողովրդավարությունը՝ պահպանելով անվտանգության և համերաշխության հավասարակշռությունը, իսկ եկեղեցին շարունակի ինքնության ու հավատքի պահպանման իր առաքելությունը։
Հատուկ անդրադարձ է կատարվել վերջին շրջանում եպիսկոպոսների ու եկեղեցականների ձերբակալություններին և Ամենայն Հայոց Կաթողիկոսին ուղղված սպառնալիքներին։ Թեմի գնահատմամբ՝ ցանկացած գործողություն, որը թուլացնում է պետության կամ եկեղեցու կարողությունը, նպատակ ունի թուլացնել հայ ազգը թե՛ ներքին, թե՛ միջազգային հարթակներում։ Հայտարարության մեջ շեշտվում է, որ այս օրհասական օրերին հրատապ է ազգային հիմնական հաստատությունների ամրապնդումը, այլ ոչ թե քանդումը, որպեսզի յուրաքանչյուրը նպաստի երկրի առաջընթացին։
Ամերիկայի Արևելյան թեմը հորդորել է հոգևորականությանը և հավատացյալ ժողովրդին մնալ հաստատակամ հավատքի մեջ և աղոթքով զորակցել Մայր Աթոռ Սուրբ Էջմիածնին ու Ամենայն Հայոց Կաթողիկոսին՝ հայցելով աստվածային առաջնորդություն, իմաստություն և խաղաղություն Հայաստանի Հանրապետության ու ողջ հայ ժողովրդի համար։
***
Վարչապետին աջակցող և կաթողիկոսի հրաժարականը պահանջող տասը արքեպիսկոպոսները դեկտեմբերի 18-ին հավաք էին հրավիրել Մայր Աթոռում:
Այդ օրը Մայր տաճարի բակում էին հավաքվել ոչ միայն տասը արքեպիսկոպոսների աջակիցները, այլև կաթողիկոսի աջակիցները: Հավաքի անվտանգությունն ապահովում էին մեծ թվով ոստիկաններ:
Հավաքն ավարտվեց նրանով, որ տասը եպիսկոպոսները հավաքվածներին տեղեկացրին՝ վեհափառի հրաժարականի պահանջով նամակ են հանձնել քարտուղարություն։
Պատմություններ
