Ի՞նչ կարոող է Հայաստանն արտահանել Ադրբեջան․ մանրամասնում է Պապոյանը

Ոչ միայն Ադրբեջանից Հայաստան ներմուծում է հնարավոր, այլ նաև արտահանում՝ Հայաստանից Ադրբեջան․ Գառնիում Սուրբ Աստվածածին եկեղեցու մոտ լրագրողների հետ ճեպազրույցում ասաց էկոնոմիկայի նախարար Գևորգ Պապոյանը։

«‎Այս պահի դրությամբ բավականին մրցունակ գին ենք ստացել վրացական երկաթուղուց, հետևաբար հնարավորությունները շատ են: Ինչպես սովորաբար պրակտիկան է եղել, իրենք հայտարարել են, մենք հաստատել ենք, ես կարծում եմ, որ հերթական անգամ վրացական-ադրբեջանական կողմը հաջող գործարքի մասին կհայտարարեն»‎,- ասաց Պապոյանը

Նրա խոսքով՝ Հայաստանը կարող է արտահանել ալյումին, ալյումինի փայլաթիթեղ, ֆերոմոլիբդեն, կենդանիներ, միրգ, բանջարեղեն, որոշ տեսակի խմիչքներ, տարբեր տեսակի տեքստիլ արտադրանքներ։

«‎Այսինքն ցանկ կա, հետազոտություն կա, աշխատանք կա, որը ցույց է տալիս, որ այդ ապրանքները մենք արտահանում ենք և Ադրբեջանը ներմուծում է, և հիմա այդ քննարկումների մեջ»‎,- հավելեց Պապոյանը։

Հոկտեմբերի 21-ին Աստանայում Ղազախստանի նախագահի հետ հանդիպմանն Ադրբեջանի նախագահ Իլհամ Ալիևը հայտարարել էր, որ Ադրբեջանը հանել է դեպի Հայաստան բեռների տարանցման բոլոր սահմանափակումները։ Նոյեմբերի 6-ին և 8-ին Ռուսաստանից և Ղազախստանից երկաթգծով Հայաստան է ներմուծվել ընդհանուր 2000 տոննա ցորեն՝ անցնելով Ադրբեջանի և Վրաստանի տարածքով։ Դեկտեմբերի 19-ին էլ ադրբեջանական բենզինով բեռնված գնացքն է ժամանել Հայաստան