Ֆեդերացիան պատասխանել է ԿԳՄՍՆ-ի հարցմանը՝ «Ադրբեջան» գրությունը ծածելու վերաբերյալ

Հայաստանի Դահուկային սպորտի ֆեդերացիան արձագանքել է ԿԳՄՍՆ-ի հարցմանը՝ հայ դահուկորդի կողմից «Ադրբեջան» գրությունը ծածկելու հետ կապված։

Իտալիայի Տոբլախ քաղաքում՝ Tour de Ski մրցարշավի ժամանակ հայ դահուկորդ Միքայել Միքայելյանը մարզահագուստի վրա Ադրբեջան գրվածքը ինքնակպչուն ժապավենով ծածկել էր։ Դահուկային սպորտի և սնոուբորդի միջազգային ֆեդերացիան (FIS) հայ դահուկորդին տուգանել էր գրվածքը ծածկելու համար։

Հունվարի 7-ին ԿԳՄՍ նախարար Ժաննա Անդրեասյանը հայտարարել էր, որ Հայաստանի Դահուկային սպորտի ֆեդերացիային հարցում են ուղարկել՝ արարքի պարզաբանման համար։ Նա նշել էր, որ «Սպորտը պետք է լինի սպորտի մասին, և կարևոր է,  որ մարզական հրապարակում մրցման ժամանակ հնարավորինս հետևենք  արդար, ազնիվ սպորտի բոլոր կանոններին»։

Ֆեդերացիայի նախագահը ֆեյսբուքյան էջում հրապարակել է թե՛ ԿԳՄՍՆ-ի հարցումը, թե՛ հարցման պատասխանը, որում գրված է․

«‎Ձեր կողմից նշված Tour de ski-ն պարզապես մրցաշար չէ, այլ դահուկավազքի Աշխարհի գավաթի փուլերից մեկն է, ինչպես նաև Ադրբեջան գրառումը եղել է ոչ թե մարզաշապիկի, այլ մրցումային համարի վրա։ Հայորդու քայլը առավել քան պարզ է և կարծում ենք, որ չունի պարզաբանման կարիք»‎։