Civilnet
Գործընկերային բովանդակություն
Հունվարի 9-ին և 10-ին Երևանի Հակոբ Պարոնյանի անվան թատրոնում ավելի քան 2000 երեխա և գրեթե նույնքան մեծահասակ հետևեցին «Հայասա» թատերախմբի «Իմ փետրավոր ընկերը» Սուրբ Ծննդյան ներկայացմանը:
Բեմադրիչ ռեժիսոր Նունե Աբրահամյանի ներկայացման ոճը հետաքրքիր էր և տեսողականապես հագեցած: Պատմության կենտրոնում մի փոքրիկ տղա է, ով ընտանիքում ամենափոքրն է և հաճախ զգում է անհավասար վերաբերմունք եղբայրների ու քույրերի կողմից: Նա որոշում է փչացնել Սուրբ Ծննդյան տոնը, սակայն այդ գիշեր հանդիպում է իր փետրավոր ընկերը՝ փոքրիկ մի հրեշտակ, ով օգնում է տղային բացահայտել իրական բարության և ընկերության արժեքը:
Նրանք միասին անցնում են հետաքրքիր արկածներով լի ճանապարհ, հաղթահարում խոչընդոտները և սովորում գնահատել ընկերությունը և վերափոխվել: Պատմության ավարտին տղան հասկանում է, որ ուրիշների ուրախությունը նրա համար նույնչափ կարևոր է, որքան սեփականը:
Ներկայացման մասսայական տեսարանները հարստացրին «Էլենը և երեխաները» պարային թատրոն ստուդիայի սաները՝ գեղարվեստական ղեկավար Էլեն Գրիգորյանի գլխավորությամբ:
Միջոցառման ավարտին երեխաներին սպասում էին նախապես պատրաստված նվերներ, որոնք ամեն տարի հասնում են Հայաստան AMAA-ի ջանքերով և տասնյակ կամավորների աջակցությամբ փաթեթավորվում ՀԱԵ-ի նախաձեռնությամբ:
AMAA-ն Հայաստանում 1991թ.-ից հայ երեխաների համար կազմակերպում է Ամանորի և Սուրբ Ծննդյան միջոցառումներ:
Վերջին տարիներին Հայաստանի մի քանի տասնյակ բնակավայրերում կազմակերպվում են նմանատիպ միջոցառումներ, որոնց, ընդհանուր առմամբ, մասնակցում են 10.000-ից ավելի մանուկներ:
Լուսանկարները՝ ՍիվիլՆեթի
Պատմություններ
