Civilnet
«Թրամփի ուղի» նախագիծը ոչ մի կերպ չի խախտում Հայաստանի ինքնիշխանությունը։ Այն բացում է Հայաստանը բիզնեսի համար և թույլ է տալիս երկրին տնտեսապես բարգավաճել։ Այս մասին հայտարարել է ԱՄՆ պետքարտուղար Մարկո Ռուբիոն հունվարի 13-ին Վաշինգտոնում Հայաստանի ԱԳ նախարար Արարատ Միրզոյանի հետ հանդիպման ժամանակ։
«Այստեղ ինքնիշխանության խնդիր չկա. դա հարգանք է նրանց ինքնիշխանության նկատմամբ»,- ասել է պետքարտուղարը։
Ռուբիոն նշել է, որ երկկողմ հարաբերությունները շարունակում են ամրապնդվել ինչպես «Թրամփի ուղի՝ հանուն միջազգային խաղաղության և բարգավաճման» (ԹՐԻՓՓ) նախագծի` Հայաստան-ԱՄՆ իրականացման շրջանակի հրապարակման վերաբերյալ համատեղ հայտարարության շրջանակում, այնպես էլ ԹՐԻՓՓ նախագծից դուրս գտնվող կարգավորումների միջոցով։
ԹՐԻՓՓ նախագիծը Ռուբիոն որակել է որպես պոտենցիալ մոդել համաշխարհային հանրության համար։
«Եվ մենք պարզապես կարծում ենք, որ ԹՐԻՓՓ (Թրամփի ուղի) պայմանավորվածությունն իսկապես վերածվելու է աշխարհի համար մի մոդելի այն մասին, թե ինչպես կարող եք բացվել տնտեսական գործունեության և բարգավաճման համար՝ առանց որևէ կերպ կասկածի տակ դնելու կամ խաթարելու ձեր ինքնիշխանությունը և տարածքային ամբողջականությունը»,- ասել է Ռուբիոն:
Ըստ պետքարտուղարի՝ ծրագիրը շահավետ կլինի թե՛ Հայաստանի, թե՛ Միացյալ Նահանգների և թե՛ բոլոր ներգրավված կողմերի համար։ Նա ընդգծել է, որ կողմերն այսօր ձեռնարկում են կարևոր քայլեր՝ այս ուղղությամբ առաջ շարժվելու հանձնառությունը կատարելու նպատակով։
Հայաստանի արտաքին գործերի նախարար Արարատ Միրզոյանը և ԱՄՆ պետքարտուղար Մարկո Ռուբիոն հունվարի 13-ին հանդիպում են ունեցել Վաշինգտոնում՝ հրապարակելու «Թրամփի ուղի՝ հանուն միջազգային խաղաղության և բարգավաճման» նախագծի (ԹՐԻՓՓ) իրականացման շրջանակը։ Ինչպես նշում է ԱԳՆ-ն, այս փաստաթուղթը «նոր քայլ է 2025 թվականի օգոստոսի 8-ին Սպիտակ տանը ձեռք բերված հանձնառությունների կյանքի կոչման ուղղությամբ՝ Հարավային Կովկասում հարատև խաղաղության գործին նպաստելու համար»։
Պատմություններ
