Նիկոլ Փաշինյանը մասնակցել է «Խաղաղության խորհրդի» հիմնադրմանը
Civilnet
Դավոսում հունվարի 22-ին ստորագրվեց «Խաղաղության խորհրդի» կանոնադրությունը։ Հայաստանի վարչապետ Նիկոլ Փաշինյանը, ի թիվս այլ երկրների առաջորդների, փաստաթուղթ է ստորագրել, որով Հայաստանը, որպես հիմնադիր անդամ, միանում է Խաղաղության խորհրդին։
Նիկոլ Փաշինյանը «Խաղաղության խորհրդին» որպես հիմնադիր անդամ է միացել ԱՄՆ նախագահ Դոնալդ Թրամփի պաշտոնական հրավերով։
Իր ելույթում Թրամփը կրկնել է այն պնդումը, թե պաշտոնը ստանձնելուց ի վեր ինքը վերջ է դրել ութ պատերազմի, այդ թվում՝ Հայաստանի և Ադրբեջանի միջև։
Նա հավելել է, որ մեկ այլ կարգավորում «սպասվում է շատ շուտով»՝ նկատի ունենալով Ուկրաինան:
Խաղաղության խորհուրդը միջազգային նոր հարթակ է: Կառույցի հիմնական առաքելությունը Գազայի հատվածի հետպատերազմյան վերակառուցման, ապառազմականացման և տարածաշրջանային կայունության ապահովման կառավարումն է:
Թրամփն այս նախաձեռնությունը ներկայացրել է որպես Միավորված ազգերի կազմակերպությանն այլընտրանքային, առավել գործնական և արդյունավետ ձևաչափ, որը պետք է գործի անմիջականորեն իր վարչակազմի հովանու ներքո:
Ըստ Թրամփի հայտարարությունների՝ խորհուրդը լինելու է «երբևէ ստեղծված ամենահզոր մարմինը»:
Խորհրդի գործադիր կազմում ընդգրկվել են ԱՄՆ պետքարտուղար Մարկո Ռուբիոն, նախագահի խորհրդական Ջարեդ Քուշները, Մեծ Բրիտանիայի նախկին վարչապետ Թոնի Բլերը և Համաշխարհային բանկի նախագահ Աջայ Բանգան:
Պատմություններ
