Civilnet
Երևանի հարավ-արևմտյան մուտքի մոտ՝ Նորագյուղ թաղամասի և «Պասկևիչի բլուր» տարածքի շուրջ 81 հեկտարի վրա, նախատեսվում է հիմնել «Երևան-Դաունթաուն» բազմաֆունկցիոնալ միջազգային կենտրոնը։ Որոշման նախագիծը հավանության է արժանացել կառավարության հունվարի 29-ի նիստին:
«Կարծում եմ բոլոր առումներով սա դրական, բարդ ծրագիր է լինելու: Մոտավորապես տևողությունը ենթադրվում է, որ 10 տարի կտևի բայց և կենտրոնի բեռնաթափման համար և Նորագյուղ թաղամասի, այդ Հողաշեն տների մարդկանց խնդիրները լուծելու համար կարևորագույն ծրագիր է»,- ասաց քաղաքապետ Տիգրան Ավինյանը:
Որոշմամբ կառավարությունը Երևանի քաղաքապետին լիազորել է պետության անունից պայմանագիր կնքել ձեռքբերող մասնավոր ընկերությունների՝ «ԴԻԹԻ ՔՈՆՍԹՐԱՔՇՆ» և «ԴԻԹԻ ԴԵՎԵԼՈՓՄԵՆԹ» ՓԲԸ-ների հետ։ Սա հիմք կհանդիսանա տարածքի նկատմամբ հանրության գերակա շահ ճանաչելու համար, ինչը թույլ կտա սկսել սեփականության օտարման և կառուցապատման գործընթացը։ Ըստ պաշտոնական հիմնավորման՝ նոր կենտրոնը կդառնա միջազգային գործարար հանգույց՝ բանկերով, հյուրանոցներով, դիվանագիտական թաղամասերով և մշակութային օջախներով։ Նախագծով նախատեսվում է 70 հարկանի երկնաքերեր կառուցել:
Ծրագիրը նախատեսում է նաև հիմնարար լուծումներ տրանսպորտային ենթակառուցվածքների համար։ Մասնավորապես, կառուցվելու է Ծովակալ Իսակով-Արշակունյաց պողոտա նոր ճանապարհատվածը, որը կմիանա Մոնթե Մելքոնյան փողոցին։ Բացի երկնաքերերից և բիզնես կենտրոններից, տարածքում կհիմնվեն նոր բնակելի թաղամասեր, դպրոցներ ու մանկապարտեզներ, ինչպես նաև ընդարձակ հանգստի գոտի՝ լրացուցիչ ջրային մակերեսներով և կանաչ տարածքներով։
Պատմություններ
