Civilnet
Համաձայն օգոստոսի 8-ին Վաշինգտոնում ստորագրված գործող պայմանագրերի՝ քայլեր ենք անում, և միջնաժամկետում ենթադրվում է, որ Հայաստանի սահմանները, անցակետերը կլինեն Հայաստանի ինստիտուտների վերահսկողության ներքո: Այս մասին կառավարությունում հունվարի 29-ի ճեպազրույցի ժամանակ հայտնեց վարչապետ Նիկոլ Փաշինյանը:
«ԹՐԻՓՓ-ը տնտեսական ներդրումային ծրագիր է առաջին հերթին, և այդ նախագծով բազմամիլիոն, 100 միլիոնների ներդրումներ են լինելու Հայաստանի Հանրապետությունում»,- ասաց վարչապետը:
Միևնույն ժամանակ, Նիկոլ Փաշինյանը վստահեցրեց, որ Հայաստանը շարունակում է զարգացնել հարաբերությունները բոլոր ուղղություններով՝ սերտորեն համագործակցելով ինչպես Ռուսաստանի, այնպես էլ Չինաստանի հետ։
«Ինչ վերաբերում է Ռուսաստանին և Չինաստանին՝ մենք շատ սերտ գործակցում ենք թե’ Ռուսաստանի, թե’ Չինաստանի հետ: Մենք Չինաստանի հետ ռազմավարական երկխոսություն ենք սահմանել: Այս տարի, եթե հիշողությունս չդավաճանի, երկու-երեք երկկողմ հանդիպում եմ ունեցել Ռուսաստանի Դաշնության նախագահի հետ: Մենք մեր հարաբերությունները բոլոր ուղղություններով զարգացնում ենք: ԹՐԻՓՓ-ը ներդրումային խոշոր ծրագիր է, որը իհարկե անվտանգային խոշոր երաշխիքներ է բերելու իր հետ»,- ասաց վարչապետը:
***
ԹՐԻՓՓ նախագիծը նախատեսված է Հայաստանի տարածքով անխոչընդոտ, մուլտիմոդալ տարանցիկ փոխկապակցվածության հաստատման համար։ Կապելով Ադրբեջանի հիմնական մասն իր Նախիջևանի Ինքնավար Հանրապետության հետ և ստեղծելով Տրանս-Կասպյան առևտրային երթուղու կենսական օղակ՝ ակնկալվում է, որ ԹՐԻՓՓ-ը միջազգային և ներպետական փոխկապակցվածության փոխադարձ առավելություններ կստեղծի Հայաստանի Հանրապետության համար։
ԹՐԻՓՓ-ի իրականացման շրջանակն ընդգծում է ինքնիշխանության, տարածքային ամբողջականության և փոխադարձության կարևորությունը ԹՐԻՓՓ-ի ընդհանուր հաջողության համար: ԹՐԻՓՓ-ի վերջնական նպատակն է ամրապնդել Հայաստանի և Ադրբեջանի բարգավաճումն ու անվտանգությունը և խթանել ամերիկյան առևտուրն՝ ընդլայնելով տարածաշրջանային առևտուրն ու փոխկապվածությունը, ինչպես նաև ստեղծելով Կենտրոնական Ասիան և Կասպից ծովը Եվրոպային կապող նոր տարանցիկ հնարավորություններ:
Պատմություններ
