Civilnet
ԱԺ նախագահ Ալեն Սիմոնյանը փետրվարի 2-ին ընդունել է Հայաստանում Իրանի Իսլամական Հանրապետության արտակարգ և լիազոր դեսպան Խալիլ Շիրղոլամիին: Այս մասին հայտնում են ԱԺ մամուլի ծառայությունից։
Խորհրդարանի ղեկավարը շնորհավորել է դեսպանին նշանակման կապակցությամբ և հույս հայտնել, որ նրա գործունեությունը կնպաստի երկու երկրների միջև հարաբերությունների հետագա ամրապնդմանն ու զարգացմանը:
Զրուցակիցներն անդրադարձել են միջխորհրդարանական կապերի զարգացմանը և տարածաշրջանային հետաքրքրություն ներկայացնող հարցերին:
ԱԺ մամուլի ծառայության տարածած պաշտոնական հաղորդագրության մեջ չի նշվում, արդյոք Հայաստանի խորհրդարանի նախագահն ու Իրանի դեսպանը քննարկել են հարևան Իրանի շուրջ ստեղծված լարված իրավիճակը։ Վերջին օրերին ԱՄՆ-ն ռազմական սպառնալիքներ է հնչեցնում Իրանի դեմ։ ԱՄՆ նախագահ Դոնալդ Թրամփն անգամ սպառնացել է ոչնչացնել Իրանը։ Իսլամական հեղափոխության առաջնորդ այաթոլլահ Սեյեդ Ալի Խամենեին փետրվարի 1-ին հայտարարել էր, որ Միացյալ Նահանգների կողմից սկսված ցանկացած նոր պատերազմ կվերածվի տարածաշրջանային պատերազմի։
Այս ամենի ֆոնին Իրանի հարևանները, այդ թվում Ադրբեջանն ու Թուրքիան իրենց միջնորդությունն են առաջարկել՝ Իրանի շուրջ լարվածությունը նվազեցնելու համար։ Պաշտոնական Երևանն առայժմ լուռ է։ Մինչ այս պահը պաշտոնական հաղորդագրություններ չկան Հայաստանի վարչապետի և արտաքին գործերի նախարարի՝ Իրանի պաշտոնյաների հետ հնարավոր հեռախոսազրույցների մասին։
Պատմություններ
