
Ադրբեջանը հրաժարվում է համագործակցել Yandex և Uber ընկերությունների միավորման արդյունքում ստեղծված NewCo ընկերության հետ․ այս մասին հայտարարել է Բաքվի տրանսպորտի գործակալության խոսնակ Մայիս Ագիևը։ Պատճառը ընկերության տնօրեն Տիգրան Խուդավերդյանի հայկական ծագումն է։
Հուլիսի 13-ին հայտնի էր դարձել, որ Yandex և Uber տաքսիները միավորում են բիզնեսները Ռուսաստանում և ԱՊՀ երկրներում, այդ թվում՝ Ադրբեջանում, Հայաստանում, Բելառուսում, Ղազախստանում, ինչպես նաև Վրաստանում։
Ագիևն ասել է, որ «Ադրբեջանի բոլոր քաղաքացիներին գլխավորապես պետք է մտահոգի այն, թե ինչն է բխում երկրի քաղաքական շահերից, իսկ ինչը՝ ոչ»։
«Այդ պատճառով Yandex Taxi և Uber ընկերությունների միավորումից հետո, եթե այդ կառույցը գլխավորելու է Հայաստանի քաղաքացի կամ ծագումով հայ, Բաքվի վարորդներին կոչ է արվելու դադարեցնել համագործակցությունը այդ ընկերության հետ»,- ասել է Ագիևը։
NewCo-ի 59,3 տոկոսը տնօրինելու է Yandex-ը, 36,6 տոկոսը՝ Uber-ը։ Մնացած 4,1%-ը լինելու է ընկերության աշխատակիցների ձեռքում։
Uber-ը Սան Ֆրանցիսկոյում հիմնված տեխնոլոգիական ընկերություն է, որը մատուցում է տրանսպորտային, այդ թվում՝ տաքսի և առաքման ծառայություններ։
Yandex Taxi-ն մատուցում է առցանց պատվերների վրա հիմնված տաքսի ծառայություններ Ռուսաստանում, ԱՊՀ երկրներում և Վրաստանում։
Միավորումից հետո հաճախորդները կշարունակեն օգտվել Yandex և Uber հավելվածներից, իսկ վարորդները պատվերներ կստանան երկուսից միաժամանակ։
Civilnet










