Կառավարությունը կփոխհատուցի լաստանավով բեռնափոխադրումները

Հայաստանի կառավարությունը որոշել է լաստանավով դեպի Հայաստան արտահանման ու ներմուծման դեպքում փոխհատուցել տնտեսվարողների համար լաստանավի ծախսերը։ Համապատասխան որոշումն ընդունվեց կառավարության մարտի 24-ի նիստում։ 

Բեռնափոխադրումների դեպքում Լարսի անցակետի փակ լինելը  կամ գերծանրաբեռնվածությունը, ըստ էկոնոմիկայի նախարարության հիմնավորման, պատճառ են դառնում, որ օրական  250 000  դոլարի արտահանում չիրականացվի։ «ԵԱՏՄ անդամ երկրների հետ ՀՀ-ը կապող միակ ցամաքային ճանապարհը Վերին Լարսն է, որի նախագծային թողունակությունը կազմում է օրական 170 բեռնատար և 200 մարդատար ավտոմեքենա՝ երկու ուղղություններով։ Այժմ այդ թիվն աճել է մի քանի անգամ՝ 650 բեռնատար և 1700 մարդատար մեքենա՝ երկու ուղղություններով։ Այդ թիվն ավելի է աճում ամռան սկզբից սկսած՝ հանգեցնելով կուտակումների։ Փոխադրողները Հայաստանից տարեկան առնվազն 10 000 անգամ անցնում են Վերին Լարսի անցակետով երկու ուղղությամբ»,- նշված է էկոնոմիկայի նախարարության հիմնավորման մեջ։ Նախարարությունն առաջարկում է, որ կառավարությունը լաստանավով կատարված բեռնափոխադրումների ծախսերն ամբողջությամբ փոխհատուցել։ 

Էկոնոմիկայի նախարարության հաշվարկներով՝ լաստանավով փոխադրման ծավալը մեկ ամսում կարող է կազմել 10 միլիոն դոլար։  Սուբսիդավորումը առայժմ տեղի կունենա վեց ամսով։ 

Կառավարության նիստին էկոնոմիկայի նախարար Վահան Քերոբյանը նշեց, որ բեռնափոխադրումն իրականացվելու է շաբաթական երկու անգամ Փոթի - Պորտ Կավկազ երթուղով։ Սա, ըստ նախարարի, թույլ կտա էապես ավելացնել պարենային անվտանգությունն ու ապրանքների մրցունակությունը։