Փաշինյանը ՌԴ դեսպանի հետ քննարկել է ԼՂ կարգավորման հարցն ու տարածաշրջանային գործընթացները

Վարչապետ Նիկոլ Փաշինյանն ընդունել է Հայաստանում Ռուսաստանի դեսպան Սերգեյ Կոպիրկինին, տեղեկացնում է վարչապետի պաշտոնական կայքը։

Հանդիպմանը քննարկվել են հայ-ռուսական համագործակցության օրակարգին, Լեռնային Ղարաբաղի հիմնախնդրի կարգավորմանն ու Հարավային Կովկասի տարածաշրջանում տեղի ունեցող գործընթացներին վերաբերող հարցեր:

«Վարչապետը նշել է, որ հայ-ռուսական դաշնակցային հարաբերությունները վերջին տարիներին կրում են դինամիկ բնույթ և հավելել, որ դրանում մեծ է ՀՀ-ում ՌԴ դեսպանության ներդրումը: Նիկոլ Փաշինյանի խոսքով՝ երկու երկրների գործընկերների միջև առկա են սերտ շփումներ, ինչը կարևոր նշանակություն ունի փոխգործակցությանը նոր ազդակ հաղորդելու գործում: Միաժամանակ, կառավարության ղեկավարը կարևորել է ԵԱՀԿ Մինսկի խմբի համանախագահ երկրների դեսպանների հետ պարբերական հանդիպումներն ու շեշտել Լեռնային Ղարաբաղի հիմնախնդրի կարգավորման գործում վերը նշված ֆորմատի կարևորությունը»,- ասված է հաղորդագրությունում։

Մայիսի 26-ին վարչապետ Նիկոլ Փաշինյանն ընդունել էր Հայաստանում Միացյալ Նահանգների դեսպան Լին Թրեյսիին։ Կրկին քննարկվել էին Լեռնային Ղարաբաղի հակամարտության կարգավորմանը և տարածաշրջանային կայունությանը վերաբերող հարցեր։

https://civilnet.am/news/662846/%d5%a1%d5%b4%d5%b6-%d6%87-%d5%bc%d5%a4-%d5%a4%d5%a5%d5%bd%d5%ba%d5%a1%d5%b6%d5%b6%d5%a5%d6%80%d5%a8-%d5%b6%d5%b8%d6%82%d5%b5%d5%b6-%d6%85%d6%80%d5%b6-%d5%a1%d5%b5%d6%81%d5%a5%d5%ac%d5%a5%d5%ac-%d5%a5%d5%b6-%d5%bd%d5%b5%d5%b8%d6%82%d5%b6%d5%ab%d6%84%d5%9d-%d5%bf%d5%a1%d6%80%d5%a2%d5%a5%d6%80-%d5%b8%d6%82%d5%b2%d5%b2%d5%b8%d6%82%d5%a9%d5%b5%d5%b8%d6%82%d5%b6%d5%b6%d5%a5%d6%80%d5%b8%d5%be/