Civilnet
Հայ-ադրբեջանական սահմանի սահմանազատման հանձնաժողովի գործունեությունը ոչ մի կապ չունի Լեռնային Ղարաբաղի Փառուխ գյուղի շուրջ ստեղծված իրավիճակի հետ։ Այս մասին հունիսի 15-ին ամենշաբաթյա ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
«Հուսով ենք, որ հանձնաժողովի գործարկումն ու աշխատանքը կնպաստեն Բաքվի և Երևանի միջև վստահության բարձրացմանը և միջադեպերի կանխարգելմանը՝ ինչպես հայ-ադրբեջանական սահմանին, այնպես էլ ռուսական խաղաղապահ զորախմբի պատասխանատվության գոտում»,- ասել է Զախարովան։
Ռուսաստանի արտաքին գործերի նախարար Սերգեյ Լավրովը նախորդ շաբաթ Երևանում հայտարարել էր, որ Հայաստանի և Ադրբեջանի միջև սահմանի դելիմիտացիայի հանձնաժողովի առաջիկա առարկայական աշխատանքի շրջանակներում կքննարկվի և լուծում կստանա նաև Փառուխի շուրջ ստեղծված իրավիճակը։ Ադրբեջանական զորքերը Փառուխի հատվածում առաջ էին շարժվել այս տարվա մարտին։
Մայիսի 24-ին հայ-ադրբեջանական սահմանին տեղի էր ունեցել սահմանազատման հանձնաժողովների առաջին հանդիպումը, որի ընթացքում պայմանավորվածություն էր ձեռք բերվել հաջորդ հանդիպումը Մոսկվայում անցկացնելու մասին։
Մարիա Զախարովան Մոսկվայի հանդիպման ժամկետների վերաբերյալ հարցին ի պատասխան ասել է․ «Պատրաստ ենք այն կազմակերպել ամենամոտ ժամանակներս։ Ադրբեջանցի և հայ գործընկերներից սպասում ենք համապատասխան ամսաթվերի վերաբերյալ առաջարկներին»։
Պատմություններ
