ԵԱՀԿ Մինսկի խմբի ամերիկացի նոր համանախագահ է նշանակվել

ԱՄՆ պետքարտուղար Էնթոնի Բլինքենը Կովկասում բանակցությունների գծով ավագ խորհրդական է նշանակել դեսպան Ֆիլիպ Ռիկերին, հայտնում է ԱՄՆ պետքարտուղարության կայքը։

Ռիկերը կկատարի նաև ԵԱՀԿ Մինսկի խմբի ամերիկացի համանախագահի գործառույթները։

Հաղորդագրությունում նշվում է, որ ԱՄՆ-ն հավատարիմ է ԼՂ հակամարտության երկարաժամկետ քաղաքական կարգավորման բանակցություններում Հայաստանին ու Ադրբեջանին աջակցություն ցուցաբերելու իր հանձնառությանը․ «Դեսպան Ռիկերը փոխգործակցելու է համախոհ գործընկերների հետ, ինչպիսին Եվրոպական միությունն է՝ նպաստելու Հայաստանի ու Ադրբեջանի միջև ուղիղ երկխոսությանը»։

Ֆիլիպ Ռիկերը Եվրոպայում և միջազգային կազմակերպություններում աշխատելու մեծ փորձ ունի: Մինչ Կովկասի հարցերով խորհրդական նշանակվելը նա ծառայել է Միացյալ Թագավորությունում Ամերիկայի Միացյալ Նահանգների դեսպանատանը։ 2019 թվականի մարտից մինչև 2021 թվականի օգոստոսը Ռիկերը կատարում է պետքարտուղարի Եվրոպայի և Եվրասիայի հարցերով օգնականի պարտականությունները։ Ավելի վաղ նա զբաղեցրել է Միլանում Միացյալ Նահանգների գլխավոր հյուպատոսի պաշտոնը, ինչպես նաև եղել է պետքարտուղարի օգնականի տեղակալ, զբաղվել է Բալկանների, Կենտրոնական Եվրոպայի և Հոլոքոստի խնդիրներով: 2008-2011 թվականներին նա եղել է Հյուսիսային Մակեդոնիայում ԱՄՆ դեսպանը։

https://civilnet.am/news/665968/%d5%b4%d5%ab%d5%b6%d5%bd%d5%af%d5%ab-%d5%ad%d5%b8%d6%82%d5%b4%d5%a2%d5%a8-%d5%a4%d5%a1%d5%a4%d5%a1%d6%80%d5%a5%d6%81%d6%80%d5%a5%d5%ac-%d5%a7-%d5%ab%d6%80-%d5%a3%d5%b8%d6%80%d5%ae%d5%b8%d6%82%d5%b6%d5%a5%d5%b8%d6%82%d5%a9%d5%b5%d5%b8%d6%82%d5%b6%d5%a8%e2%80%a4-%d5%ac%d5%a1%d5%be%d6%80%d5%b8%d5%be/