Հայկ Մարությանը խախտեց լռությունը․ նրա ներկայացման տոմսերը երեք ժամում սպառվել են

Երևանի նախկին քաղաքապետ Հայկ Մարությանի՝ այսօր հայտարարած «Քաղաքապետը» մոնո ներկայացման տոմսերն արդեն սպառվել են։ Այդ մասին տեղեկանում ենք տոմսերի վաճառքով զբաղվող «Տոմսարկղ» կայքից։ Ներկայացումը կայանալու է սեպտեմբերի 19-ին և 20-ին։ 

Մարությանն իր նոր ներկայացման մասին հաղորդեց սեպտեմբերի 5-ին։ Ներկայացման երկու օրվա համար արդեն վաճառվել է ավելի քան 1600 տոմս։ Տոմսերը սպառվել են մոտ երեք ժամում։ Ներկայացման անոնսից հասկանալի է դառնում, որ Մարությանի ներկայացումը քաղաքական ուղղվածություն ունի և ներկայացնելու է որպես քաղաքապետ իր պաշտոնավարումը։ 

Մարությանը պաշտոնանկությունից հետո լռություն է պահպանում և քաղաքական պլանների մասին հայտարարություններ չի արել։ Նոր ներկայացման մասին հայտարարությամբ Մարությանը խախտել է այդ լռությունը։ 

Հայկ Մարությանը Երևանի քաղաքապետն էր 2018-ից, նա հեղափոխությունից հետո ձևավորած «Իմ քայլ»-ը դաշինքի առաջին համարն էր։ Երեք տարի անց, սակայն, Երևանի ավագանում իշխող «Իմ քայլը»-ի ավագանու անդամները սկսեցին Մարությանին անվստահություն հայտնելու գործընթաց, և վերջինս պաշտոնանկ արվեց։ 

Մարությանին մեղադրում էին քաղաքական թիմի գծից շեղվելու մեջ։ Ավագանու այդ նիստում Մարությանն այդ ամենն անվանեց հեղաշրջում, ներկայացրեց, թե ինչպես է իշխող «Իմ քայլը» խոչընդոտել իր գործունեությանն ու փորձել տապալել համայնքային ավտոբուսների ձեռքբերումը։