Նյու Յորքում հանդիպել են Հայաստանի և Ադրբեջանի ԱԳ նախարարները՝ Բլինքենի միջնորդությամբ
Civilnet
Սեպտեմբերի 19-ին, ՄԱԿ Գլխավոր վեհաժողովի 77-րդ նստաշրջանի շրջանակում, ԱՄՆ պետքարտուղար Էնթոնի Բլինքենի միջնորդությամբ տեղի է ունեցել Հայաստանի ԱԳ նախարար Արարատ Միրզոյանի և Ադրբեջանի ԱԳ նախարար Ջեյհուն Բայրամովի հանդիպումը, հաղորդում է Հայաստանի ԱԳՆ-ն։
«Հանդիպման ընթացքում Արարատ Միրզոյանը ընդգծել է, որ ադրբեջանական զինված ուժերը պետք է դուրս բերվեն ՀՀ ինքինիշխան տարածքից, ուժի կամ ուժի սպառնալիքի կիրառումն անընդունելի են, իսկ հետագա էսկալացիաների կանխարգելման նպատակով պետք է ներդրվեն միջազգային մեխանիզմներ։ ՀՀ ԱԳ նախարարը կարևորել է հումանիտար խնդիրների, այդ թվում` ռազմագերիների հայրենադարձման շուտափույթ կարգավորումը։ Նախարար Միրզոյանը վերահաստատել է հայկական կողմի պատրաստակամությունը՝ ներգրավվելու հարաբերությունների համապարփակ կարգավորման գործընթացում»,- նշվում է Հայաստանի ԱԳՆ հաղորդագրությունում։
ԱՄՆ պետքարտուղարի գրասենյակի տարածած հաղորդագրությունում էլ նշվում է, որ Էնթոնի Բլինքենը ԱԳ նախարարներին կոչ է արել հանդիպել նաև մինչև այս ամսվա վերջ։
Պատմություններ
