Civilnet
Տարածաշրջանում ռազմաքաղաքական վիճակը էականորեն սրվել է, Ադրբեջանը օրեր շարունակ զորքեր է կուտակում Լեռնային Ղարաբաղի հետ շփման գծի ու հայ-ադրբեջանական սահմանի երկայնքով։ Կառավարության սեպտեմբերի 7-ի նիստին այդ մասին հայտարարեց վարչապետ Նիկոլ Փաշինյանը։
«Ադրբեջանական մամուլում ու քարոզչական հարթակներում ահագնացել է հակահայկական ատելության հռետորաբանությունը։ Սեպտեմբերի 1-ին ադրբեջանական զինուժը սադրանք ձեռնարկեց ՀՀ ինքնիշխան տարածքի նկատմամբ, որի հետևանքով զոհվեցին երեք զինծառայողներ։ Դրան նախորդել ու հաջորդել են սահմանին հրադադարի ռեժիմի խախտման մասին կեղծ լուրերի տարածումը Ադրբեջանի կողմից»,- ասաց նա։
Փաշինյանի խոսքով իրավիճակն այնպիսին է, որ միջազգային հանրությունը, ՄԱԿ-ի անվտանգության խորհրդի անդամ երկները պետք է լրջագույն միջոցներ ձեռնարկեն տարածաշրջանում նոր պայթյունը կանխելու համար։
Նա նաև նշեց, որ Լեռնային Ղարաբաղում հումանիտար ճգնաժամը հասել է գագաթնակետին։
«ՀՀ-ն պատրաստ է ու ցանկանում է խաղաղության ու հարաբերությունների կարգավորման պայմանագիր կնքել Ադրբեջանի հետ, մենք հավատարիմ ենք խաղաղության օրակարգին»,-հայտարարեց Հայաստանի վարչապետը։
***
Սեպտեմբերի 5-ին Արցախի պաշտպանության բանակը տեսանյութ էր հրապարակել, որտեղ երևում էր ադրբեջանական զինուժի տեղաշարժերը և կենտրոնացումը։
Պատմություններ
