Որ դեպքում Հայաստանը դուրս կգա ՀԱՊԿ-ից․ Փաշինյանի պատասխանը

Հայաստանը սառեցրել է իր անդամակցությունը ՀԱՊԿ-ին․ կազմակերպության նիստերին չի մասնակցում, մշտական ներկայացուցիչ էլ չի նշանակում, բայց սա ոչ թե իրավական, այլ քաղաքական գնահատական է։ Մարտի 12-ին Կառավարությունում հրավիրած ասուլիսի ժամանակ հայտարարեց վարչապետ Նիկոլ Փաշինյանը։ 

«Մենք ակնկալում ենք, խնդրում ենք, պահանջում ենք, որ ՀԱՊԿ-ը պատասխանի մեկ հարցի՝ ո՞րն է ՀԱՊԿ պատասխանատվության գոտին ՀՀ-ում։ Մենք ՀԱՊԿ-ի հետ կաված պրոբլեմ չենք ստեղծել, բոլոր պրոբլեմները սկսվել են այն կետից, երբ մենք հարց ենք բարձրացրել, թե որն է ՀԱՊԿ-ի պատասխանատվության գոտին ՀՀ-ում ու պատասխան չենք ստացել»,- հայտարարեց Փաշինյանը։ 

Նրա խոսքով՝ երբ ՀԱՊԿ-ը կպատասխանի այդ հարցին ու այդ պատասխանը կհամապատասխանի ՀՀ պատկերացումներին, դա կնշանակի, որ Հայաստանի ու ՀԱՊԿ-ի միջև հարցերը հասցեագրված են ու լուծված, եթե ոչ՝ Հայաստանը դուրս կգա ՀԱՊԿ-ից։ 

Փաշինյանն ասաց, որ վերջին անգամ ՌԴ նախագահի հետ խոսել է Ամանորից առաջ։

***

2022-ի սեպտեմբերի 13-ին Ադրբեջանը Գորիսի, Սոթքի և Ջերմուկի ուղղությամբ հարձակվել էր Հայաստանի վրա։ Նույն օրը Հայաստանի պահանջով հրավիրված ՀԱՊԿ խորհրդի նիստում որոշում էր ընդունվել կազմակերպության միացյալ շտաբի պետի ղեկավարությամբ դիտորդական առաքելություն ուղարկել Հայաստան։ Առաքելությունը պետք է գնահատեր ստեղծված իրավիճակը, տարածաշրջանում իրավիճակի վերաբերյալ հանգամանալից զեկույց պատրաստեր և Հայաստանի ու Ադրբեջանի սահմանին առանձին շրջաններում առաջացած լարվածության թուլացման վերաբերյալ առաջարկություններ մշակեր։

2022-ի նոյեմբերի 24-ին Երևանում կայացած ՀԱՊԿ գագաթնաժողովում վարչապետ Նիկոլ Փաշինյանը հայտարարել էր, որ պատրաստ չէ ստորագրել Հայաստանին օժանդակություն ցուցաբերելու ՀԱՊԿ որոշման նախագիծը, քանի որ դրանում բացակայում է ադրբեջանական ագրեսիայի վերաբերյալ քաղաքական գնահատականը։

Վերջին ամիսներին Հայաստանի վարչապետը և այլ հայ բարձրաստիճան պաշտոնյաներ չեն մասնակցել ՀԱՊԿ նիստերին։

https://civilnet.am/news/766312/%d5%b0%d5%a1%d5%b5%d5%a1%d5%bd%d5%bf%d5%a1%d5%b6%d5%a8-%d5%b6%d5%a1%d6%87-%d5%a4%d5%a5-%d5%b5%d5%b8%d6%82%d6%80%d5%a5-%d5%af%d5%bd%d5%a1%d5%bc%d5%a5%d6%81%d5%b6%d5%ab-%d5%a1%d5%b6%d5%a4%d5%a1%d5%b4%d5%a1%d5%af%d6%81%d5%b8%d6%82%d5%a9%d5%b5%d5%b8%d6%82%d5%b6%d5%a8-%d5%b0%d5%a1%d5%ba%d5%af-%d5%ab%d5%b6-%d5%a5%d5%a9%d5%a5-%d5%b6%d5%a5%d6%80%d5%af%d5%a1-%d5%ab%d6%80%d5%a1%d5%be%d5%ab%d5%b3%d5%a1%d5%af%d5%a8-%d5%b7%d5%a1%d6%80%d5%b8%d6%82%d5%b6%d5%a1%d5%af%d5%be%d5%ab%e2%80%a4-%d6%83%d5%a1%d5%b7%d5%ab%d5%b6%d5%b5%d5%a1%d5%b6/