Կառավարությունը կաջակցի Լոռու ու Տավուշի ագրոբիզնեսի այն ներկայացուցիչներին, որոնք տուժել են մայիսի 25-26-ի հեղեղների հետևանքով։ Համապատասխան որոշումն ընդունվեց կառավարության հուլիսի 27-ի նիստում։
Խոսքը այն ագրոընկերությունների մասին է, որոնք գյուղատնտեսության ոլորտին տրամադրվող վարկերի տոկոսադրույքների սուբսիդավորման ծրագրի շահառուներ են։
«Լոռու և Տավուշի մարզերում ագրոպարենային ոլորտում տնտեսավարող մի շարք շահառուների մոտ առաջացել են խնդիրներ՝ վարկի մայր գումարի և տոկոսադրույքի հերթական վճարումները ու մարումը սահմանված ժամկետներում իրականացնելու հարցում։ Ինչի արդյունքում, շահառուները կարող են դուրս մնալ ծրագրի շրջանակից և զրկվել աջակցությունից օգտվելու հնարավորությունից»,- նշված է որոշման հիմնավորումներում։
Ըստ կառավարության՝ կա նման շուրջ 100 վարկառու՝ 150 մլն դրամ վարկային մնացորդով։
Կառավարության որոշմամբ՝ այս ընկերությունների համար կտրվի վարկային տարկետում։ Մասնավորապես, կերկարաձգվի վարկի մարման ժամկետը, ինչպես նաև վարկի մայր գումարի կամ տոկոսադրույքի մարման համար սահմանված արտոնյալ ժամկետը մինչև մեկ տարով։ Յուրաքանչյուր շահառուի մասով երկարաձգման ժամկետը պետք է գնահատի ֆինանսական կառույցը։
Մայիսի 26-ին հորդառատ անձրևների պատճառով հեղեղումներ էին առաջացել Տավուշի և Լոռու մարզերի մի շարք համայնքներում՝ պատճառելով հսկայական նյութական կորուստներ, առաջացնելով ճանապարհների և կամուրջների փլուզումներ։ Հեղեղումների հետևանքով զոհվել է 4 մարդ։
