Շոթա Կինչա, OC Media
Եվրոպացի առաջնորդները բացահայտ հայտարարել են, որ ԵՄ-ին Վրաստանի անդամակցության գործընթացը դադարեցված է՝ կապված Վրաստանի կողմից օտարերկրյա գործակալների մասին օրենքի ընդունման հետևանքների և կառավարության քննադատների դեմ ուղղված քաղաքական բռնությունների ալիքի հետ: Ուրբաթ հայտարարություն է տարածել Եվրոպական խորհուրդը՝ ԵՄ անդամ երկրների ղեկավարներից կազմված մարմին, որը պատասխանատու է ԵՄ հիմնական քաղաքականության որոշման, այդ թվում՝ նոր անդամների միանալու համար:
Խորհուրդը նշել է, որ Վրաստանի «գործողության ներկա ընթացքը դե ֆակտո հանգեցրել է ԵՄ-ին անդամակցելու գործընթացի դադարեցմանը»:
Հունիսի 27-28-ին Բրյուսելում կայացած ԵՄ գագաթնաժողովից հետո եվրոպացի առաջնորդների եզրակացությունները Վրաստանի՝ վերջերս ընդունած «Օտարերկրյա ազդեցության թափանցիկության մասին» օրենքը որակում են «հետընթաց Եվրոպական հանձնաժողովի կողմից թեկնածուի կարգավիճակի վերաբերյալ հանձնարարականում նշված քայլերից»:
Անցյալ դեկտեմբերին Եվրոպական խորհուրդը Վրաստանին շնորհեց անդամակցության թեկնածուի կարգավիճակ՝ թեև ի սկզբանե մերժել էր դա անել՝ Վրաստանի կառավարության կողմից ինստիտուցիոնալ և ժողովրդավարական բարեփոխումների բացակայության պատճառով:
Ուրբաթ օրվա հայտարարությունում Եվրոպական խորհուրդը Վրաստանի կառավարությանը կոչ է անում «հստակեցնել իրենց մտադրությունները՝ փոխելով ներկայիս գործողությունների ընթացքը, որը վտանգում է Վրաստանի ԵՄ ուղին»։
Խորհուրդը Վրաստանի իշխանություններին նաև կոչ է անում «վերջ դնել քաղաքացիական հասարակության ներկայացուցիչների, քաղաքական առաջնորդների, քաղաքացիական ակտիվիստների և լրագրողների դեմ ահաբեկման, սպառնալիքների և ֆիզիկական հարձակումների աճող գործողություններին»։ Խորհուրդը հայտարարել է, որ ուշադիր հետևելու է հոկտեմբերին կայանալիք խորհրդարանական ընտրություններին և վերահաստատել է իր «անդրդվելի աջակցությունը Վրաստանի տարածքային ամբողջականությանը»։
Բրյուսելի գագաթնաժողովին ընդառաջ պաշտոնից հեռացող՝ ԵՄ արտաքին քաղաքականության պատասխանատու Ժոզեպ Բորելը քննադատել է Վրաստանի վարչապետ Իրակլի Կոբախիձեի վերջին պնդումն այն մասին, որ օտարերկրյա գործակալների մասին վիճահարույց օրենքը Վրաստանին ավելի է մոտեցրել Եվրամիությանը։
«Ես ուզում եմ հստակ ասել՝ ոչ: Ո՛չ։ Այս օրենքը և դրա շուրջ բացասական բոլոր զարգացումները Վրաստանին հեռացնում են Եվրամիությունից։ Ես չեմ կարող ավելի պարզ, ավելի ստույգ լինել»,- ասել է նա հունիսի 24-ին Լյուքսեմբուրգում ԵՄ արտաքին հարաբերությունների խորհրդի նիստից հետո:
Էստոնիայի վարչապետ Կայա Կալլասը, որը ևս քննադատել է Վրաստանի կառավարության վերջին քայլերը, ընտրվել է Բորելի փոխարինող:
ԵՄ-ի բարձր մակարդակի այս հանդիպումներն ընդգծել են Վրաստանի հետընթացը Ուկրաինայից և Մոլդովայից՝ այսպես կոչված «ասոցացված եռյակի» մյուս անդամներից, որոնց հետ անդամակցության բանակցություններ սկսվեցին Ռուսաստանի՝ Ուկրաինա լայնամածավալ ներխուժումից հետո:
«Երկու երկրներն էլ տպավորիչ նվիրվածություն են ցուցաբերել բարեփոխումներին և դրանք եվրոպական արժեքներին համապատասխանեցնելուն»,- երեքշաբթի ասել է ԵՄ խորհրդի նախագահ Շառլ Միշելը։
«Եվրամիությունն իր ինստիտուտների և անդամ պետությունների միջոցով պատրաստ է աջակցել Ուկրաինային և Մոլդովային այս ճանապարհի յուրաքանչյուր քայլում։ Մենք կտրամադրենք անհրաժեշտ ռեսուրսներ, փորձաքննություն և քաղաքական աջակցություն»:
Միևնույն ժամանակ, ԵՄ-ն ակտիվ քննարկում է Վրաստանի կառավարությանը տրամադրվող ֆինանսական օգնությունը նվազեցնելու, ինչպես նաև Վրաստանի ղեկավարների հետ հանդիպումները նվազագույնի հասցնելու հարցը:
Հաղորդվում է, որ բացի Հունգարիայի դեսպանից, ԵՄ դեսպանները, ինչպես նաև ԱՄՆ դեսպանը արհամարհել են ուրբաթ Վրաստանի վարչապետ Իրակլի Կոբախիձեի ամենամյա ուղերձը խորհրդարանին:
Իր ելույթում Կոբախիձեն «Վրացական երազանքի» գլխավորած խորհրդարանական մեծամասնությանը գովաբանել է օտարերկրյա գործակալների մասին օրենքն ընդունելու համար և վերահաստատել, որ իր կառավարությունը երկիրը կհասցնի ԵՄ անդամակցությանը մինչև 2030 թվականը։
Նույն ելույթում վարչապետը նշել է, թե ԵՄ-ն և ԱՄՆ-ը «ապաօլիգարխիզացիայի» կարիք ունեն, մի բան, որ ԵՄ-ի պահանջներից մեկն է Վրաստանին անդամակցելու ուղղությամբ առաջընթաց գրանցելու համար:
Կոբախիձեն խոստացել է «անել ամեն ինչ»՝ Վրաստանում Արևմուտքի հանրային համբավը փրկելու համար, քանի որ «ԵՄ-ի և ԱՄՆ-ի հեղինակությունը վտանգված է Վրաստանի ընդդիմությանը նրանց աջակցության համար»:
«Վրացական հասարակությունը վայրկյան անգամ չպետք է մտածի, որ ԱՄՆ-ը և ԵՄ-ն աջակցում են [նախկին նախագահ Միխեիլ Սաակաշվիլիի հիմնադրած] Միացյալ ազգային շարժմանը, որի «2004-2012 թվականներին կառավարումն առանձնացավ մեծ թվով մարդկանց խոշտանգումներով, բանտերի գերբեռնվածությամբ, բիզնեսների ռեկետով, հեռուստաընկերությունների կողոպուտով, երկրի տարածքային կորուստներով և այլ բաներով»:
Կոբախիձեն ասել է, որ ինքը և իր կուսակցությունը «եվրոպական և ամերիկյան ինստիտուտների» տարբեր ներկայացուցիչների անվանել են «պատերազմի գլոբալ կուսակցություն» նույն պատճառով՝ փրկելու վրացիների շրջանում ԵՄ-ի և ԱՄՆ-ի հեղինակությունը:
