ԵՄ անդամակցության մասին նախագծի քվեարկությունը հետաձգվել է

«Եվրոպական Միությանը Հայաստանի Հանրապետության անդամակցելու գործընթացի մեկնարկի մասին» օրենքի նախագիծն այս շաբաթ ԱԺ քառօրյայի ժամանակ երկրորդ ընթերցմամբ չի քննարկվի և չի քվեարկվի, մինչդեռ հակառակն էր նախատեսված։  

ԱԺ եվրոպական ինտեգրման հարցերի հանձնաժողովի նախագահ Արման Եղոյանը լրագրողների հետ ճեպազրույցում  հայտնել է, որ այսօր հանձնաժողովում նախագիծը սահմանված ժամկետից երկար է քննարկվել, ըստ այդմ, որոշում է կայացվել հետաձգել երկրորդ ընթերցման քվեարկությունը։

«Կանոնակարգ օրենքի համաձայն՝ պետք է այսօր մինչև ժամը 12:00 նախագծի վերջնական տեքստը ներկայացնեինք ԱԺ խորհրդին՝ այս քառօրյայում ընդգրկելու համար, սակայն չհասցրեցինք»,- ասել է Եղոյանը։

Եղոյանի հավաստմամբ, նախագծի քննարկումը բուն տեքստի մասին չէր, բովանդակային խնդիր չկա։ 

«Կառավարությունը մի քանի առաջարկ էր ներկայացրել նախագծի վերաբերյալ, որոնք իրավական տեխնիկական հարցեր են, նաև առաջարկել էին նախաբանը հանել»,- ասել է Եղոյանը:

Նախագծի երկրորդ ընթերցումը և քվեարկությունը տեղի կունենա կամ հաջորդ  ԱԺ քառօրյայի, կամ՝ արտահերթ նիստի ժամանակ։ 

«Այս օրենքը չի հանդիսանում Եվրամիության անդամակցության հայտ: Այս օրենքը համապատասխանում է մեր՝ ԵՄ-ի հետ առավել մերձեցման ուղղությանը»,- հանձնաժողովի նիստի ժամանակ այսօր ասել է ԱԳ փոխնախարար Պարույր Հովհաննիսյանը։

Փետրվարի 12-ին Ազգային ժողովը 63 կողմ, 7 դեմ ձայների հարաբերակցությամբ առաջին ընթերցմամբ ընդունել է «Եվրոպական միությանը Հայաստանի Հանրապետության անդամակցելու գործընթացի մեկնարկի մասին» օրենքի նախագիծը: Նախագիծը կառավարությունը հաստատել էր հունվարի 9-ին։