Վարդան Ղուկասյանի հետ կապված ենթադրյալ ձայնագրության հիման վրա քրեական գործ է հարուցվել

Գյումրիի նախկին քաղաքապետ, Կոմունիստական կուսակցության քաղաքապետի թեկնածու Վարդան Ղուկասյանի հետ կապված ենթադրյալ ձայնագրության հիման վրա քրեական գործ է հարուցվել, հայտնում են Գլխավոր դատախազությունից։

Վարույթը նախաձեռնվել է Քրեական օրենսգրքի 236 հոդվածի հատկանիշներով, որը վերաբերում է հավաքին մասնակցելուն հարկադրելուն և հավաքին մասնակցելու կամ չմասնակցելու նպատակով նյութական շահագրգռմանը։ Հետաքննությունն իրականացվում է Քննչական կոմիտեի կողմից։

Ընտրություններից 4 օր առաջ իշխանամետ լրատվամիջոցներն առաջինը հրապարակեցին այս ձայնագրությունը՝ չբացահայտելով դրա աղբյուրը։

Ձայնագրության մեջ, ենթադրաբար, Վարդան Ղուկասյանը շուկայի աշխատակիցների հետ հանդիպում կազմակերպելու մասին է խոսում՝ հիշեցնելով, որ ինքն է նրանց տաղավարներ տրամադրել, որոնց շնորհիվ նրանք մինչ օրս ապրուստ են վաստակում։ Ձայնագրությունում հայհոյախառն արտահայտություններ կան։

Ղուկասյանն ինքը ուղղակիորեն չի հերքում այն, սակայն միաժամանակ ակնարկում է, որ ձայնագրությունը կարող է արհեստական բանականությամբ պատրաստված լինել։

***

Մարտի 30-ին Գյումրիում արտահերթ ՏԻՄ ընտրություններ էին։ Ընտրություններին մասնակցած ոչ մի ուժ չի հաղթահարել 50 տոկոսի շեմը, հետևաբար հայտնի չէ, թե ով կլինի Գյումրիի ապագա քաղաքապետը։

Ավագանու ընտրություններում շեմը հաղթահարած ուժերից «Մայր Հայաստանը» և «Իմ հզոր համայնքը» պատրաստակամություն են հայտնել աջակցելու Վարդան Ղուկասյանի ղեկավարած ուժին։ Սակայն նրանց քվեները միասին բավարար չեն քաղաքապետ ընտրելու համար։ «Մեր քաղաքը» դաշինքի Մարտուն Գրիգորյանի որոշումից է կախված, թե արդյոք ընդդիմությունը կամ «Քաղաքացիական պայմանագիրը» կկարողանան կոալիցիա ձևավորել և քաղաքապետ ընտրել։

Եթե Գյումրիի թեկնածուներից որևէ մեկը չստանա 17 մանդատ, նրանց միջև կանցկացվի քվեարկության 2-րդ փուլ: