Առաջիկա օրերին հայկական կողմին կհանձնվի վիզաների ազատականացման գործողությունների ծրագիրը․ նախարար

Եվրամիության հետ վիզաների ազատականացման ուղղությամբ ակտիվ աշխատանքներ են ընթանում, և առաջիկա օրերին հայկական կողմին պաշտոնապես կհանձնվի վիզաների ազատականացման գործողությունների ծրագիրը։ Այս մասին հայտնել է ՆԳ նախարար Արփինե Սարգսյանն Ազգային ժողովի մշտական հանձնաժողովների համատեղ նիստում «ՀՀ 2026-ի պետական բյուջեի մասին» օրենքի նախագծի քննարկման ընթացքում։

Սարգսյանը հայտարարել է, որ  ծրագրի ստացումը կհստակեցնի բարեփոխման ենթակա այն ուղղություններով իրականացվող միջոցառումները, որոնք Հայաստանի կառավարությունն արդեն իսկ թիրախավորել է Միգրացիայի և քաղաքացիության ոլորտում։ 

«Այս տեսանկյունից հստակ կլինեն Հայաստանի պետական մարմինների կողմից իրականացվող միջոցառումները, որոնք Հայաստանի կառավարությունն արդեն իսկ թիրախավորել է որպես բարեփոխման ենթակա ուղղություններ»,- ասել է նախարարը։ 

Հայաստանը և ԵՄ-ն վիզաների ազատականացման շուրջ երկխոսության մեկնարկի մասին հայտարարել էին 2024-ի սեպտեմբերին։

Անդրադառնալով բիոմետրիկ անձնագրերի ներդրմանը, Սարգսյանը փաստել է, որ աշխատանքները շարունակվում են, կա կնքված պայմանագիր, և մասնավոր գործընկերոջ հետ որոշարկվել են տարածքային գրասենյակների մանրամասները։ Վերջնականացվել են տարածքային գրասենյակների արտաքին նկարագրերը և հաստատվել բիոմետրիկ նույնականացման քարտի արտաքին նկարագիրը, իսկ առաջիկայում կհաստատվի անձնագրի արտաքին նկարագիրը։ 

ՆԳ նախարարի խոսքով, պետք է վերանայվեն ծառայության շենքային պայմանները, որի շինարարական աշխատանքների նախատեսման մոդելային տարբերակը նախատեսված է մասնավոր գործընկերոջ հետ։ Այս աշխատանքների ապահովումը կիրականացվի 2026-ի առաջին կիսամյակում, իսկ նույն թվականի երկրորդ կիսամյակից կմեկնարկի բիոմետրիկ նոր անձնագրերի և նույնականացման քարտերի արտադրությունը։ Նախարարը նշել է, որ նոր համակարգի ներդրման պայմանները մանրամասն քննարկվել են մասնավոր գործընկերոջ հետ, որպեսզի անցումը լինի սահուն, իսկ հերթերի պատկերը՝ կառավարելի։

Միգրացիայի և քաղաքացիության ոլորտի բարեփոխումների համատեքստում Արփինե Սարգսյանը կարևորել է նաև Ազգային ժողովի կողմից 2025-ի հուլիսի 3-ին ընդունված «Բնակչության պետական ռեգիստրի մասին» ՀՀ նոր օրենքը։ Ներկայացնելով ընթացիկ տարվա քայլերը, նա նշել է, որ ներկայումս ընթանում է X-Road փոխգործելիության հարթակի ներդրումը, որը կապահովի գերատեսչությունների միջև տվյալների արագ և անվտանգ փոխանակումը։