Աջափնյակի մետրոյի կառուցման միջոցներն ուղղվել են տրոլեյբուսների ձեռքբերմանը

Երևանի Աջափնյակ թաղամասում մետրոպոլիտենի նոր կայարանի կառուցման համար նախատեսված բյուջետային հատկացումներն այս տարի ենթարկվել են կտրուկ վերանայման. նախնական 9,6 մլրդ դրամից աշխատանքների համար մնացել է 1,6 մլրդ դրամ։ Օգտագործված միջոցներն ուղղվել են 45 նոր տրոլեյբուսների գնմանը, որոնք Երևան կհասնեն 2026-ի առաջին ամիսներին, պարզաբանել է Երևանի քաղաքապետ Տիգրան Ավինյանը դեկտեմբերի 23-ի ավագանու նիստի ժամանակ։

Անդրադառնալով մետրոյի շինարարության ձգձգմանը՝ Ավինյանը պարզաբանել է, որ Աջափնյակի կայարանի նախագիծը բարդության 5-րդ աստիճանի է, և միայն դրա պարզ փորձաքննությունը տևել է մոտ մեկ տարի։ 

«Սա մեր նորանկախ պատմության երևի թե ամենաբարդ նախագծերից մեկն է»,- նշել է նա՝ հավելելով, որ գործընթացը պահանջել է երկարատև համաձայնեցումներ նախագծողների և փորձաքննողների միջև։

2026-ի բյուջեով նախագծի համար նախատեսվել է ևս 2 մլրդ դրամ։

«Այս բարդ պրոցեսում ես ձեզ վստահեցնում եմ, ոնց ունեցել ենք Կասկադը, այդպես ունենալու ենք մետրոյի կայարանի կառուցումը։ Իսկ 2 մլրդ-ն էլ նախատեսված է առաջին հերթին տեղհսկողի մրցույթի համար և որոշ չափով օտարումներ իրականացնելու համար»,- ասել է քաղաքապետը։  

Քննարկման ընթացքում ավագանու անդամների կողմից հնչել է քննադատություն առ այն, որ բյուջետային պլանավորումը թերի է իրականացվել։ Մասնավորապես, նշվել է, որ «կառուցման աշխատանքներ» տողով նախատեսված 9,6 մլրդ դրամը չպետք է տարվա կեսից վերաբաշխվեր այլ կարիքների համար, և որ աշխատանքները պետք է մեկնարկած լինեին հենց այս տարի։ Ի պատասխան՝ Տիգրան Ավինյանը վստահեցրել է, որ նախագիծն իրականացվելու է՝ ընդգծելով, որ նոր կայարանը մետրոպոլիտենի ուղևորահոսքը կավելացնի շուրջ 22-25%-ով։

***

Դեռևս հունիսին քաղաքապետի նախկին մամուլի խոսնակ Հայկ Կոստանյանը հայտարարել էր, որ Երևանի քաղաքապետարանը չի կարողանա ձեռք բերել տարեսկզբին խոստացված 45 տրոլեյբուսներից 30-ը՝ թերհավաքագրումների պատճառով։ Իրավիճակի համար Կոստանյանը մեղադրել էր տրանսպորտի թանկացման դեմ պայքարողներին։

«Թերհավաքագրումները բերելու են նրան, որ այդ գումարը չկա, և 30 տրոլեյբուս արդեն դուրս է եկել ցանկից»,- ասել էր Կոստանյանը։

Հոկտեմբերին Երևանի քաղաքապետ Տիգրան Ավինյանը հայտնել էր, որ առանց տոմսի ուղևորներին վարչական պատասխանատվության ենթարկելու օրենքի ընդունումից հետո եկամուտների 20% աճ է գրանցվել։

Նոյեմբերին էլ Ավինյանը հայտարարեց, որ քաղաքապետարանը 12 մետրանոց 45 տրոլեյբուս է գնել, որոնք Հայաստան կհասնեն հաջորդ տարվա առաջին կիսամյակում։