ԱՄՆ-ի հետ միջուկային բանակցությունները նախատեսված են ուրբաթ Օմանում․ Արաղչի

 Իրանի և Միացյալ Նահանգների միջև միջուկային ծրագրի շուրջ բանակցությունները տեղի կունենան փետրվարի 6-ին Օմանում։  Տեղեկությունը հաստատել է Իրանի արտաքին գործերի նախարար Աբբաս Արաղչին, հայտնում է Irna-ն։ 

Նախարարը հայտարարել է, որ հանդիպումը նախատեսված է Մասկատի ժամանակով առավոտյան ժամը 10-ին։ 

Արաղչին սոցիալական ցանցերում իր երախտագիտությունն է հայտնել օմանյան կողմին անհրաժեշտ կազմակերպչական աշխատանքների համար, իսկ ավելի վաղ Իրանի նախագահ Մասուդ Փեզեշքիանը հայտնել էր, որ հանձնարարել է արտգործնախարարին վարել արդարացի և հավասարազոր բանակցություններ։ 

Սպիտակ տան պաշտոնական ներկայացուցիչը հաստատել է, որ ԱՄՆ-ն կմասնակցի բարձր մակարդակի այս քննարկումներին Օմանում։ 

Կատարի, Թուրքիայի և Եգիպտոսի միջնորդները կողմերին են ներկայացրել հիմնարար սկզբունքների շրջանակ, որն ըստ իրազեկ աղբյուրների՝ ներառում է Իրանի հանձնառությունը զգալիորեն սահմանափակել ուրանի հարստացումը, ինչպես նաև սահմանափակումներ բալիստիկ հրթիռների կիրառման և տարածաշրջանային դաշնակիցների զինման հարցերում։ 

Այս բանակցություններն ընթանում են տարածաշրջանային լարվածության ֆոնին, երբ ԱՄՆ նախագահ Դոնալդ Թրամփը հրամայել է ուժեր կուտակել Արաբական ծովում՝ նախորդ ամիս Իրանում բողոքի ցույցերի ճնշումից հետո։ ԱՄՆ պետքարտուղար Մարկո Ռուբիոն նշել է, որ Վաշինգտոնն ակնկալում է քննարկել ոչ միայն միջուկային ծրագիրը, այլև բալիստիկ հրթիռների, պրոքսի ցանցերին աջակցելու և սեփական ժողովրդի նկատմամբ վերաբերմունքի հետ կապված հարցերը։