Civilnet
Հայաստանի երրորդ նախագահ Սերժ Սարգսյանի նկատմամբ հարուցված նոր քրեական գործով նախաքննության փուլում կիրառված խափանման միջոցը՝ երկրից չբացակայելու արգելքը, վերացվել է։
«Արմենպրես»-ի հաղորդմամբ՝ այս մասին հայտնել են Հակակոռուպցիոն դատարանից։
Դատարանից նշել են, որ խափանման միջոցը վերացվել է դատախազությանը պարտավորեցնելու միջոցով։
«Քանի որ դատավորը փոխարինող է եղել, այդ պատճառով նա չէր կարող ինքնուրույն վերացնել խափանման միջոցը։ Դատավորը պարտավորեցրել է դատախազությանը՝ վերացնել կիրառված խափանման միջոցը»,-ասել են դատարանից։
***
Սերժ Սարգսյանի նկատմամբ հարուցված է չորս քրեական գործ, որոնք ներկայումս քննվում են երեք առանձին դատական վարույթներով: Առաջին վարույթը միավորում է երկու քրեական դրվագ՝ գյուղատնտեսական ծրագրի շրջանակում 489 մլն դրամի պետական միջոցների ենթադրյալ վատնման («Դիզվառելիքի գործ») և գործարար Սիլվա Համբարձումյանից 7 մլն դոլար կաշառք ստանալու մեղադրանքները:
Երկրորդ առանձին վարույթը վերաբերում է պաշտոնեական լիազորությունների ենթադրյալ չարաշահմանը, որի շրջանակում Սարգսյանին մեղադրանք է առաջադրվել Պետական պահպանության ծառայության միջոցները օրենքով նման իրավունք չունեցող անձանց անվտանգության համար ծառայեցնելու վերաբերյալ։
Երրորդ վարույթը հարուցվել է «Եռաբլուր» զինվորական պանթեոնի հարակից տարածքների և Պաշտպանության նախարարության հաշվեկշռում գտնվող այլ հողատարածքների օտարման գործընթացում թույլ տրված ենթադրյալ չարաշահումների փաստով։
Բոլոր վարույթներով Սերժ Սարգսյանն ունի մեղադրյալի կարգավիճակ և չի ընդունում առաջադրված մեղադրանքները։
Պատմություններ
