Ինչո՞ւ Հայաստանը չի ցավակցել Իրանին՝ հոգևոր առաջնորդի սպանության կապակցությամբ․ նախարարի արձագանքը
Civilnet
Պաշտոնական Երևանը դեռևս չի ցավակցել Իրանին՝ երկրի գերագույն առաջնորդ Այաթոլլա Ալի Խամենեի սպանության կապակցությամբ։ Հայաստանի արդարադատության նախարար Սրբուհի Գալյանը մարտի 2-ին ԱԺ-ում լրագրողների հետ ճեպազրույցի ընթացքում մեկնաբանելով այս հարցը՝ նշեց, որ ինքը Անվտանգության խորհրդի անդամ չէ և հայտարարություն չի անի, թե ինչու մինչ այս ցավակցական հայտարարություն չի եղել։
«Չեմ անի որևէ հայտարարություն։ Ես վստահ եմ, որ մեր կառավարության, այդ թվում և ինձ համար ցավալի են այն իրադարձությունները, որոնք տեղի են ունենում նախ և առաջ ժողովրդի տեսանկյունից, բայց այդ հարցին պատասխանել չեմ կարող, որովհետև ոչ ոլորտի պատասխանատուն եմ և ոչ էլ անկեղծ ասեմ՝ մասնագետը»,- ասաց նա։
Գալյանը հրաժարվեց դիրքորոշում հայտնել նաև այն մասին, թե արդյոք ԱՄՆ-ի հետ հարաբերությունները կաշկանդում են կառավարությանը նման քայլ անել՝ վերահաստատելով, որ ոլորտին չի տիրապետում։ Նախարարը միևնույն ժամանակ ընդգծեց, որ Իրանը շարունակում է մնալ բարեկամ պետություն և համագործակցությունը տարբեր ոլորտներում շարունակվում է՝ հավելելով, որ իր վաղվա օրակարգում ներառված է հանդիպում Իրանի դեսպանի հետ։
Անդրադառնալով դիտարկմանը, թե պատերազմական իրավիճակում իշխող թիմը ներկուսակցական քարոզարշավ է իրականացնում, Սրբուհի Գալյանը հարցին հարցով պատասխանեց, թե ինչ պետք է աներ կառավարությունը, որ բացարձակ անտարբեր չթվար Հայաստանի սահմաններից դուրս կատարվողի հանդեպ։
Նա նշեց, որ հարգում է լրագրողի կարծիքը, թե պաշտպանության և արտաքին գործերի նախարարները չպետք է լինեին փողոցում, սակայն շեշտեց որ եթե Անվտանգության խորհուրդը գնահատել է, որ երկրի անվտանգությանը սպառնացող վտանգ չկա, ապա չկա պատճառ ներքին օրակարգից շեղվելու համար։
Փետրվարի 28-ին Իսրայելն ու ԱՄՆ-ն լայնածավալ ռազմական հարձակում են սկսել Իրանի դեմ։ Հարձակման առաջին օրը սպանվել է Իրանի հոգևոր առաջնորդ Այաթոլլա Ալի Խամենեին։ Ռազմական գործողություններն ընդգրկում են Մերձավոր Արևելքի երկրները։ Իրանն՝ ի պատասխան, հարվածներ է հասցնում տարածաշրջանի երկրների տարածքում տեղակայված ԱՄՆ բազաներին և Իսրայելին։ Իսրայելը հարվածում է նաև Լիբանանին։
Տեղադրություն
Պատմություններ
