Հնարավոր չէ կապ հաստատել Իրանի հայկական թեմերի հետ․ Արամ Ա

Հաղորդակցության միջոցների լիակատար ընդհատման պատճառով հնարավոր չէ կապ հաստատել Իրանի հայկական թեմերի հետ։ Այս մասին ասված է Մեծի Տանն Կիլիկիոյ կաթողիկոս Արամ Ա-ի հայտարարության մեջ։ Հայտարարությունը հաջորդում է ԱՄՆ-ի և Իսրայելի կողմից Իրանի դեմ մեկնարկած լայնամասշտաբ ռազմական գործողություններին, որոնք ընդգրկել են ողջ տարածաշրջանը։

Անթիլիասի Մայրավանքից տարածված հաղորդագրության համաձայն՝ պատերազմական գործողությունները հանգեցրել են մարդկային զոհերի, ավերածությունների և սոցիալական ճգնաժամի Մերձավոր Արևելքի հայաշատ գաղութներում։ Վեհափառ Հայրապետը կոչ է արել անհապաղ դադարեցնել կրակը և հակամարտության արդար լուծումը փնտրել քաղաքական բանակցությունների միջոցով։

Կաթողիկոսությունը հորդորել է թեմական պատասխանատուներին ձեռնարկել անվտանգային միջոցներ՝ համայնքները ռազմական ռիսկերից հեռու պահելու համար։ Այսօր երեկոյան նախատեսված է Ազգային կենտրոնական վարչության արտակարգ նիստ՝ քննարկելու ստեղծված օրհասական իրավիճակը և թեմերին ցուցաբերվող հնարավոր աջակցությունը։