Հայկ Ղազարյան
Ապրիլի 1-ի դրությամբ Հայաստանից մեկնել է 46,768 բռնի տեղահանված արցախցի, որոնցից վերադարձել է 31,823-ը։ Այսինքն՝ 2023-ի սեպտեմբերյան բռնի տեղահանությունից հետո 14,936 արցախցի հեռացել և (դեռ) չի վերադարձել Հայաստան։ Նախորդ ամսվա համեմատ վերադարձածների թիվը ավելացել է 54-ով։
Միևնույն ժամանակ, Ազգային անվտանգության ծառայությունից ՍիվիլՆեթի գրավոր հարցմանը պատասխանեցին, որ 2020-ի նոյեմբերից մինչև 2023-ի սեպտեմբեր ընկած ժամանակահատվածում Հայաստանից «070» ծածկագիր ունեցող անձնագրով մեկնել է 26,882 անձ, վերադարձել՝ 19,464-ը։ Այսինքն՝ այդ ժամանակահատվածում հեռացած արցախցիների թիվը կազմում է 7,418 անձ։
Մեծանում է նաև ՀՀ նոր անձնագրեր ստացողների թիվը։ ՍիվիլՆեթին Ներքին գործերի նախարարությունից հայտնեցին, որ ապրիլի 3-ի դրությամբ 34 հազար արցախցի դիմել է քաղաքացիություն ստանալու համար, որոնցից 24,376-ը արդեն ստացել է։ Ըստ գերատեսչության՝ ևս 12 հազար անչափահաս փաստաթղթավորվել է ՀՀ քաղաքացու անձնագրով։
Ավելի վաղ Միգրացիայի և քաղաքացիության ծառայությունից Ինֆոքոմին հայտնել էին, որ բռնի տեղահանվածների ընդհանուր թիվը մոտ 150,000 է, և նշել էին, որ հստակ թիվ հայտնել հնարավոր չէ։
Պատմություններ
