Մայիսի 18-ին վարչապետի հետ վիճաբանած կնոջը՝ Երևանի թիվ 16 պոլիկլինիկայի մանկաբարձ-գինեկոլոգ Արփինե Սողոյանին առաջարկել են սեփական դիմումի համաձայն թողնել աշխատանքը։ Տեղեկությունը լրատվամիջոցներին հաստատել է Սողոյանի դուստրը՝ Տաթևիկ Սողոյանը։
Արաբկիր համայնքում մայիսի 18-ին քարոզարշավի ժամանակ մի կին դիմելով վարչապետ Նիկոլ Փաշինյանին՝ նրան մեղադրել էր հայրենիքը գողանալու, հազարավոր զոհերի համար։
«Դուք գողացել եք իմ հայրենիքը, մի ամբողջ երիտասարդ սերունդ եք ոչնչացրել, Դուք գողացել եք իմ եղբորը, իմ ուրախությունը, Դուք փորձեցիք մեզ կզացնել, մենք չենք կզել»,- ասել է կինը:
Ի պատասխան Փաշինյանն էլ ասել է․
«Եթե դուք Ռոբն եք (խմբ․ նկատի ունի ՀՀ երկրորդ նախագահ Ռոբերտ Քոչարյանին), ձեզ կզացնելու եմ։ Էդ Ղարաբաղի ակցենտով դիմակավորվածներ կան, որ վիդեոներ են տարածում։ Դո՛ւք եք փախած լակոտները, հանե՛ք ձեր դիմակները, ա՛յ ստահակներ, ա՛յ փախածներ, ա՛յ մեր երեխեքին հակառակորդի առաջ մենակ թողածներ։ Ռոբի՛ լակոտներ, Սերժի՛ լակոտներ, Գագոյի՛ լակոտներ»։
Անդրադառնալով Արփինե Սողոյանին աշխատանքից ազատելու վերաբերյալ հայտարարությանը, Երևանի քաղաքապետ Տիգրան Ավինյանը News.am-ի հետ զրույցում բացառել է, որ որևէ մարդ իր քաղաքական հայացքների համար կազատվի աշխատանքից։
«Բացառվում է, որ որևէ մարդ իր քաղաքական հայացքների համար ազատվի աշխատանքից։ Մանավանդ որ խոսքը գնում է կնոջ մասին, ով եղբորն է կորցրել և իր էմոցիան կարող է արտահայտել այսկերպ կամ այնկերպ»,- ասել է Ավինյանը:
Պատմություններ
