Ծառուկյանի ընկերությունների աշխատակիցները շարունակում են ակցիաները

Հուլիսի 14-ին Ծառուկյանին պատկանող «Մուլտի Գրուպի», նաև «Մուլտի Տաբակի» աշխատողները բողոքի ակցիաներ են իրականացրել՝ պահանջելով վերականգնել իրենց աշխատանքը։

Հուլիսի 13-ին ևս «Մուլտի Գրուպի» կազմում գտնվող մի շարք ընկերությունների, նաև «Երևանի Արարատ կոնյակի-գինու-օղու կոմբինատ»-ի աշխատակիցները բողոքի ակցիաներ էին իրականացրել՝ նույն պահանջով։

Աշխատակիցները նշում են, որ երեկ դիմել են Քննչական կոմիտե, սակայն այնտեղ որևէ տեղեկություն չեն ստացել, թե երբ կարող են վերաբացվել ընկերությունները կամ ինչ ընթացք ունի գործը։

«Գոնե ասեն՝ աշխատելու ենք, թե չենք աշխատելու։ Եթե մեկ ամիս հետո է բացվելու, իմանանք, եթե փակվում է, դա էլ իմանանք, որ մեր հետագա քայլերը ծրագրենք»,- ասում են աշխատակիցները։

Արդեն իններորդ օրն է, ինչ Ծառուկյանին պատկանող մի շարք ձեռնարկություններ փակ են։ Ծառուկյանին ձերբակալելու օրը քննչական գործողություններ են իրականացվել նաև նրան պատկանող տարբեր օբյեկտներում։ Կապարանակնքվել են Ծառուկյանին պատկանող մի շարք կառույցներ։