Արցախի Հանրապետության Ազգային ժողովի նախագահի պարտականությունները կատարող Գագիկ Բաղունցը կոչ է արել COP17 համաժողովի մասնակիցներին ուշադրություն դարձնել Արցախի հայ բնակչության բռնի տեղահանման էկոլոգիական և կենսամշակութային հետևանքներին։
Այս մասին Բաղունցը նշել է համաժողովի պատվիրակներին և մասնակիցներին ուղղված ուղերձում։
Նրա խոսքով՝ տեղահանությունը հանգեցրել է ոչ միայն տների, գույքի և ապրուստի միջոցների կորստի, այլև խզել է համայնքների և նրանց պատմական բնակավայրերի բնական, մշակութային ու սոցիալական միջավայրի միջև սերունդների ընթացքում ձևավորված կապերը։
Բաղունցը նշել է, որ ավանդական գյուղատնտեսությունը, ոռոգման և ջրամատակարարման համակարգերը, անտառներն ու արոտավայրերը, սրբավայրերն ու մշակութային սովորույթները կազմում են եզակի կենսամշակութային համակարգ, որի կործանումը նշանակում է կենսամշակութային բազմազանության կորուստ։
Նա COP17-ի մասնակիցներին կոչ է արել ապահովել տեղահանված համայնքների մասնակցությունը էկոլոգիական հետազոտությունների, բնապահպանական նախաձեռնությունների և էկոհամակարգերի վերականգնման ծրագրերի մշակմանը։
Բաղունցը նաև հորդորել է միջազգային համապատասխան մեխանիզմների շրջանակում շարունակել տեղահանված բնակչության իրավունքների պաշտպանության հարցերի քննարկումը՝ հաշվի առնելով կացարանի, սեփականության, մշակութային ժառանգության և բնական միջավայրի հետ կապված իրավունքների պաշտպանության անհրաժեշտությունը։
«Մենք կոչ ենք անում COP-17-ի մասնակիցներին այս խնդիրը դիտարկել կենսաբազմազանության պահպանման, մշակութային հաջորդականության և մարդու իրավունքների փոխկապակցվածության համատեքստում, ինչպես նաև արցախահայերի՝ դեպի պատմական Հայրենիք հավաքական, անխոչընդոտ և անվտանգ վերադարձի իրավունքի համատեքստում»,- ասվում է ուղերձում։
Կենսաբանական բազմազանության մասին ՄԱԿ-ի կոնվենցիայի կողմերի 17-րդ համաժողովը՝ COP17-ը, անցկացվելու է հոկտեմբերի 19-30-ը Երևանում՝ «Գործողություններ հանուն բնության» խորագրով։ Համաժողովի ընթացքում կքննարկվեն կենսաբազմազանության պահպանման, էկոհամակարգերի վերականգնման, բնապահպանական ծրագրերի ֆինանսավորման և կլիմայի փոփոխության հետ կապված հարցեր։
Պատմություններ
