Պատմաբանների հանձնաժողովի ստեղծման գաղափարը դանդաղեցրել է Ցեղասպանության ճանաչումը. Ա. Մանուկյան
Civilnet
Լուսանկարը` ՍիվիլՆեթի
Հայ-թուրքական արձանագրությունների շրջանակում Հայաստանի իշխանությունների կողմից պատմաբանների հանձնաժողովի ստեղծման մտքին համաձայնելը դանդաղեցրել է Ցեղասպանության ճանաչան գործընթացը: Ապրիլի 24-ին Ցեղասպանության զոհերի հիշատակը հավերժացնող Ծիծեռնակաբերդի հուշահամալիրում լրագրողների հետ զրույցում նման տեսակետ հայտնեց ԱԺ ՀԱԿ խմբակցության քարտուղար Արամ Մանուկյանը:
«Այդ պահից սկած միջազգային հանրությունը սկսեց ոչ պինդ, ամուր ձևով այս հարցին հետամուտ լինել: Դա ամենամեծ հարվածն էր, որ Ցեղասպանության ճանաչման գործընթացում եղավ: Երկրորդ ամենամեծ հարվածն այն էր, որ շարունակաբար Հայաստանը չի կարողանում ունենալ ժողովրդի վստահությունը վայելող իշխանություն: Հենց սա է պատճառը, որ Հայաստանը չի կարողանում միջազգային հանրության առջև պատմական լուրջ հարցեր դնել»,- ասաց Մանուկյանը:
Նրա գնահատմամբ` այսօր Ծիծեռնակաբերդ երկու ագամ ավելի քիչ մարդ է եկել, քան նախկինում, քանի որ ժողովուրդը լքում է Հայաստանը:
«Նրա համար չեն եկել, որ չեն ուզում, այլ պարզապես ֆիզկապես ներկա չեն Հայաստանում»,- ասաց ՀԱԿ ներկայացուցիչը:
Նա տեղեկացրեց, որ Լևոն Տեր-Պետրոսյանը Ծիծեռնակաբերդ չի այցելել վատառողջ լինելու պատճառով: Սակայն Տեր-Պետրոսյանի փոխարեն Ծիծեռնակաբերդում էին նրա կինը` Լյուդմիլա Տեր-Պետրոսյանը և զավակները:
Հարցին, թե ինչու ընդդիմության բոլոր ներկայացուցիչները, քաղաքական կուսակցությունները միասին չեն այցելում Եղեռնի զոհերի հիշատակի հուշահամալիր, Մանուկայնն ասաց, որ դա սովորույթի հարց է:
«Միշտ էլ այդպես է եղել, դրա տակ անկազմակերպություն մի´ տեսեք, զուտ սովորության, ավանդույթի ուժով է»,- հավելեց նա:
Տեղադրություն
Պատմություններ
