Հայկ ԽանումյանՇուշիում արդեն չորս տարի է՝ գործում է Street Workout երիտասարդական մարզական շարժումը: Սա մարզաձև է, որը ենթադրում է համալիր վարժությունների ամբողջություն պտտաձողերի և զուգաձողերի վրա: Արդեն չորրորդ տարին է՝ Տիգրան Բաղդասարյանը, շուշեցի երիտասարդ, կամավոր սկզբունքներով մարզում է պատանիներին՝ նրանց բանակ ուղարկելով ֆիզիկական գերազանց արդյունքներով: Ոչ պրոֆեսիոնալ այս մարզաձևը կարևոր է նրանով, որ հնարավորություն ունի դառնալու զանգվածային՝ առանց սահմանափակման իր մեջ ներգրավելով պոտենցիալ մարզիկների: Մարզաձևն ինքնին առողջ ապրելակերպի քարոզ է և կարևոր ծխախոտի ու ալկոհոլի դեմ պայքարի տեսանկյունից, հատկապես արցախյան փոքրիկ քաղաքներում և գյուղերում, որտեղ պատանիների ու երիտասարդների համար ժամանցի քիչ տարբերակներ կան:
Առողջ քաղաքացու իդեալ ունեցող Տիգրան Բաղդասարյանը ցանկանում է մարզաձևը տարածել ամբողջ Արցախով մեկ և դարձնել այն ավելի զանգվածային: Նա նաև երազանք ունի Շուշին դարձնել չծխողների և չխմողների քաղաք:
Երբ հասարակության մեջ կան մարդիկ, որոնք երազում են հասարակության որակների բարձրացման ուղղությամբ և քայլեր են ձեռնարկում իրենց երազանքներն իրականացնելու համար, ապա այդ հասարակություններն ապագա ունեն: Տիգրանի նման երազանք ունեցողների դուք էլ կարող եք տեսնել ձեր շրջապատում, նրանք կան բոլոր ոլորտներում և որպես կանոն աշխատում են էնտուզիազմով և նվիրվածությամբ:
Չնայած մեզ շրջապատող բացասական ինֆորմացիային և կեղծ արժեքների քարոզին՝ իդեալ ունեցող մարդիկ միշտ էլ կարողանում են մթնոլորտ փոխել: Բոլորիս խնդիրն է այդ տեսակի խրախուսումը:
Պատմություններ
